>
15 лютага другі раз правядзе дзень народзінаў у няволі Арцём Ласкі з Брэста, адзін з 18 палітзняволеных у папраўчай установе адкрытага тыпу (ПУАТ) у Мазыры. Яму споўніцца 42 гады.
Арцёма Ласкага разам з многімі іншымі асудзілі за ўдзел у мірнай акцыі
пратэсту ў Брэсце 13 верасня 2020 г., якая адбылася з-за недаверу да абвешчаных
вынікаў прэзідэнцкіх выбараў. Прыгавор – 2 гады абмежавання волі з накіраваннем
у ПУАТ – быў вынесены 30 жніўня 2021 г. судом Ленінскага раёна Брэста. Справу
вялі па частцы 1 “народнага” артыкула 342 Крымінальнага кодэкса («Арганізацыя і
падрыхтоўка дзеянняў, якія груба парушаюць грамадскі парадак, альбо актыўны
ўдзел у іх»).
З 11 снежня 2021 г. жыхар Брэста знаходзіцца ў ПУАТ. 14 снежня 2021 г.
праваабаронцы прызналі яго палітзняволеным. Яму можна напісаць на адрас: ПУАТ № 17, бульвар Юнацтва, 24, г. Мазыр,
247783.
26 лютага трэці год сустрэне дзень народзінаў у зняволенні Вікторыя Кульша, тройчы асуджаная палітзняволеная, якая знаходзіцца
ў жаночай калоніі № 24 у г. п. Зарэчча Рэчыцкага раёна. Яна была затрымана 4
лістапада 2020 г. за адміністраванне пратэстнага “Тэлеграм”-канала “Кіроўцы
97”. 3 сакавіка 2021 г. прызнана праваабаронцамі палітзняволенай. Першы
прыгавор https://palesse.press/news.php?slug=0070
ёй быў вынесены 4 чэрвеня 2021 г. у судзе Заводскага раёна Мінска – 2,5 гады
пазбаўлення волі ў калоніі агульнага рэжыму, па частках 1 і 2 ўсё таго ж арт.
342 Крымінальнага кодэкса. Віну, як і двое іншых асуджаных адміністратараў
гэтага канала, яна не прызнала.
У зняволенні Вікторыю асудзілі яшчэ 2 разы за “злоснае
непадпарадкаванне” (арт. 411 КК). Такая крымінальная справа ўзбуджаецца па
ініцыятыве адміністрацыі калоніі.
Адзін з гэтых прысудаў быў вынесены судом Чыгуначнага раёна Гомеля 13 чэрвеня 2022 г., пасля чаго
палітзняволеную перавялі ў калонію ў Зарэчча. Там адбываюць пакаранні жанчыны,
асуджаныя пры незнятай судзімасці. У Зарэччы Вікторыю змяшчалі ў ШІЗА, затым –
у памяшканне камернага тыпу на 6 месяцаў.
Другі прыгавор https://palesse.press/news.php?slug=7609
вынес суд Рэчыцкага раёна 7 красавіка 2023 г. Кожны з прыгавораў – яшчэ 1 год
пазбаўлення волі, гэта максімальны тэрмін за “злоснае непадпарадкаванне”. Такім
чынам, па трох прыгаворах тэрмін зняволення Вікторыі складае 4,5 гады.
Напісаць ёй можна на адрас: ПК №
24, вул. Вытворчая, 44, г. п. Зарэчча, Рэчыцкі р-н, Гомельская вобл., 247526.
У калоніі ў Зарэччы знаходзяцца 4 палітзняволеныя-жанчыны.
Агульная колькасць палітзняволеных у месцах зняволення ў Гомельскай вобласці на
цяперашні час – 179, у цэлым па Беларусі – 1408.
На здымку: Арцём Ласкі.
