>
Палітычным
зняволеным прызнаны 56-гадовы жыхар г. Хойнікі Алег Казлоў. Аб гэтым гаворыцца
ў чарговай заяве аб прызнанні новых палітзняволеных, якую прынялі
праваабаронцы.
У сваіх «Ютуб»-каналах Алег Казлоў, былы майстар-электрамантажнік, дзяліўся
меркаваннямі па грамадска-палітычных пытаннях, а пасля ўварвання расійскіх
войск ва Украіну ў мінулым годзе размясціў некалькі відэа з рухам расійскай
ваеннай тэхнікі.
Яго абвінавацілі па шасці артыкулах
Крымінальнага кодэкса: частка 1 артыкула 130 – «Распальванне расавай,
нацыянальнай, рэлігійнай альбо іншай сацыяльнай варожасці альбо варажнечы»,
арт. 188 – «Паклёп», ч.1 і 2 арт. 361-1 – «Стварэнне
экстрэмісцкага фарміравання альбо ўдзел у ім», ч. 2 арт. 367 – «Паклёп у
дачыненні да Прэзідэнта Рэспублікі Беларусь», ч. 1 арт. 368 – «Абраза
Прэзідэнта Рэспублікі Беларусь» і арт. 369 – «Абраза прадстаўніка ўлады».
Працэс супраць жыхара Хойнік вёўся ў
Гомельскім абласным судзе з 9 чэрвеня. Разглядаў справу суддзя Доля Мікалай у закрытых пасяджэннях –
такім чынам, на судзе не маглі прысутнічаць ні сваякі падсуднага, ні іншыя
наведвальнікі. 17 жніўня быў вынесены прыгавор: пазбаўленне волі (тэрмін
высвятляецца) у калоніі агульнага рэжыму. 24 лістапада МУС унёс грамадзяніна ў пералік асобаў, якія «маюць дачыненне да экстрэмісцкай
дзейнасці».
Напісаць паштоўку альбо ліст палітзняволенаму
можна на адрас: Казлову Алегу
Віктаравічу, СІЗА № 3, вул. Кніжная, 1А, г. Гомель, 246003.
Заяву аб прызнанні 22 новых палітзняволеных
праваабаронцы прынялі 8 снежня, з Гомельскай вобласці ў ёй 5 чалавек, сярод
якіх – Алег Казлоў, а таксама, як ужо паведамлялася, 40-гадовая Сняжана Цадава з Лоеўскага раёна.
Нагадаем, што раней палітзняволенай была прызнана
жыхарка Хойнік Ірына Абдукерына. Агульная колькасць палітзняволеных у
Беларусі на цяперашні час – 1474.
