Праваабарончая супольнасць Беларусі прыняла заяву аб прызнанні яшчэ сямі вязняў кіроўнага ў Беларусі рэжыму палітычнымі зняволенымі.
Паводле інфармацыі Гомельскай Вясны, праваабаронцам вядома, што Ігару Жывалуну з Рэчыцы сёлета 29 студзеня ў Гомельскім абласным судзе прызначылі пакаранне ў выглядзе пазбаўлення волі. На які тэрмін карны апарат вырашыў кінуць яго за краты праваабаронцы зараз высвятляюць. Судзіў яго Яўген Шаршнёў, якога Лукашэнка прызначыў на пасаду суддзі. Ён абвясціў Жывалуна вінаватым у садзейнічанні экстрэмісцкай дзейнасці (ч. 1 арт. 361-4 Крымінальнага кодэкса). У чым канкрэтна палягала тое садзейнічанне пакуль невядома.
Найчасцей улады абвяшчаюць падобнымі “злачынствамі” грашовыя ахвяраванні ініцыятывам салідарнасці беларускай грамадзянскай супольнасці альбо беларускім вайсковым фармаванням, якія дапамагаюць Украіне абараняцца ад расійскай узброенай агрэсіі. Прычым, падобныя ініцыятывы самі ж карныя структуры, без якога-кольвек абгрунтавання абвяшчаюць экстрэмісцкімі.
16 кастрычніка 2023 года Ігара Жывалуна схапілі супрацоўнікі карных органаў і зняволілі на 15 содняў. Фармальнай прычынай арышту назвалі адміністрацыйнае правапарушэнне, якое яны запісалі ў ч. 1 арт. 19.11 Кодэксу аб адміністрацыйных правапарушэннях і назвалі “распаўсюд, выраб, захоўванне, перавозка інфармацыйнай прадукцыі, якая ўтрымлівае заклікі да экстрэмісцкай дзейнасці альбо прапагандуе такую дзейнасць”.
Праваабаронцам вядома, што фактычна Ігара тады зняволілі за рэалізацыю ягонага права на атрыманне і распаўсюд інфармацыі, зафіксаванае ў артыкуле 19 Усеагульнай дэкларацыі правоў чалавека. Адміністрацыйным правапарушэннем карнікі назвалі тое, што ў сацыяльнай сетцы Facebook ён сярод іншага цікавіўся навінамі, якія пашырае тэлеканал “Белсат”, перапошчваючы некаторыя пасты з ягонай суполкі. Раней карнікі абвясцілі ўсе без выключэння матэрыялы гэтага медыя экстрэмісцкімі, а сам канал экстрэмісцкім фармаваннем.
Ігар Жывалун паходзіць з Сумской вобласці Украіны. Пасля пачатку паўнамаштабнага ўварвання расійскіх войскаў на ягоную Радзіму і акупацыі ягонага роднага мястэчка Нэдрыгайлаў, ён актыўна пачаў пашыраць праз сваю старонку ў Facebook інфармацыю, якая дапамагала шукаць зніклых на вайне цывільных і вайсковых украінцаў, а таксама ўсялякую антываенную інфармацыю, звесткі пра ўдзел беларусаў у абароне Украіны ад расійскіх агрэсараў. У тым ліку і інфармацыю тэлеканала “Белсат”.
