>
24 лютага ў судзе Мазырскага раёна
працягнецца працэс, на якім мясцовы жыхар Уладзімір Андрэйчук абвінавачваецца ў
«гвалце ў адносінах супрацоўніка органаў унутраных спраў» і «грубым парушэнні
грамадскага парадку».
Судовае
пасяджэнне будзе праходзіць з 10 гадзін.
Абодва
артыкулы Крымінальнага кодэкса, у якіх абвінавачваецца грамадзянін, масава
ўжываюцца беларускімі ўладамі пасля пратэстаў, якія адбываліся ў 2020 годзе. Прычынай
пратэстаў быў недавер да абвешчаных уладамі вынікаў прэзідэнцкіх выбараў.
Асабліва
часта па палітычных матывах прымяняецца артыкул 342 КК (арганізацыя і
падрыхтоўка дзеянняў, якія груба парушаюць грамадскі парадак, альбо актыўны
ўдзел у іх), звесткі аб чым мы ўжо публікавалі. Паводле гэтага артыкула
чалавека могуць засудзіць да 4 гадоў пазбаўлення волі.
Артыкул
364 – падстава для таго, каб адправіць у зняволенне на тэрмін да 7 гадоў (гвалт
альбо пагроза прымянення гвалту ў адносінах супрацоўніка органаў унутраных
спраў). У месцах зняволення ў Гомельскай вобласці зараз знаходзяцца 10 чалавек,
якія асуджаны паводле гэтага артыкула і якіх праваабаронцы прызналі палітычнымі
зняволенымі. З іх адзін – у калоніі № 20 у
Міхалкаўскім сельсавеце Мазырскага раёна, адзін – у папраўчай установе адкрытага
тыпу (ПУАТ) № 21 у Мазыры і адна палітзняволеная-жанчына – у жаночай калоніі № 24 ў
г. п. Зарэчча Рэчыцкага раёна.
Акрамя
таго, артыкул 364 стаў падставай для асуджэння 4 палітзняволеных-жанчын, якія
цяпер знаходзяцца ў жаночай калоніі № 4 у Гомелі і для 3 палітзняволеных у
гомельскай ПУАТ № 17.
У
цэлым па краіне паводле арт. 364 у месцах зняволення зараз знаходзяцца 140
палітзняволеных (з іх 5 жанчын, якія, як адзначана вышэй, адбываюць пакаранні ў
Гомельскай вобласці).
Агульная
колькасць палітзняволеных на цяперашні час у Гомельскай вобласці – 184, у
Беларусі – 1441.
На здымку: суд Мазырскага раёна.
