>>
16 лютага ў судзе Мазырскага раёна будзе разглядацца
справа, ў якой абвінавачаным з’яўляецца мясцовы жыхар Уладзімір Андрэйчук.
Абвінавачанні яму выстаўлены па тых жа артыкулах Крымінальнага кодэкса, што і
шматлікім іншым людзям за пратэстныя акцыі.
Судовае пасяджэнне
пачнецца ў 14:10. Уладзімір Андрэйчук
абвінавачаны паводле часткі 1 «народнага» артыкула 342 Крымінальнага кодэкса –
«Арганізацыя і падрыхтоўка дзеянняў, якія груба парушаюць грамадскі парадак,
альбо актыўны ўдзел у іх», а таксама паводле арт. 364 – «Гвалт альбо пагроза
ўжывання гвалту ў адносінах супрацоўніка органаў унутраных спраў». Суддзя па
гэтай справе – Галіна Кніжонак.
Пасля прэзідэнцкіх
выбараў 2020 г., абвешчаныя вынікі якіх былі падвергнуты ў народзе сумненню, у
«грубым парушэнні грамадскага парадку» абвінавачваюць тых, хто ўдзельнічаў у
акцыях пратэсту.
У прыватнасці, з 5 палітычных зняволеных, якія зараз
адбываюць пакаранні ў калоніі № 20 у Міхалкаўскім сельсавеце Мазырскага раёна, 1 асуджаны паводле арт. 342 КК. У жаночай калоніі № 24 у г. п.
Зарэчча Рэчыцкага раёна з 3 палітзняволеных-жанчын таксама 1 асуджана паводле гэтага артыкула. Гэты ж артыкул прымяняўся
для асуджэння 15 з 27 палітзняволеных, якія у цяперашні час адбываюць пакаранні
ў папраўчай установе адкрытага тыпу (ПУАТ) № 21 у Мазыры.
Акрамя таго, у гомельскім СІЗА-3 паводле артыкула 342
КК зараз знаходзяцца 13 палітзняволеных (у тым ліку 4 жанчыны), у гомельскай
жаночай калоніі № 4 – 29, у гомельскай ПУАТ № 17 – 8.
Такім чынам, з 185 палітзняволеных, якія зараз
знаходзяцца ў месцах зняволення ў Гомельскай вобласці, 67 (альбо 36,2%) былі абвінавачаны
паводле арт. 342 КК.
У цэлым па Беларусі з 1441 чалавека, якія на цяперашні
час знаходзяцца ў зняволенні і прызнаны праваабаронцамі ў якасці
палітзняволеных, паводле арт. 342 КК былі абвінавачаны 497 чалавек, альбо 34,4%
ад агульнай колькасці палітзняволеных. Многія з іх атрымалі абвінавачанні
адразу па некалькіх крымінальных артыкулах.
На здымку:
суд Мазырскага раёна.
