>>
Пётр
Драздоў і Сяргей Старавойтаў – жыхары Мінска,
якія адбываюць пакаранні ў Мазырскім раёне – увайшлі у спіс людзей, прызнаных
палітычнымі зняволенымі на працягу кастрычніка.
Кандыдат эканамічных навук Пётр Драздоў быў дацэнтам
кафедры лагістыкі Інстытута бізнеса і менеджмента тэхналогій Беларускага
дзяржаўнага ўніверсітэта. Яго затрымалі 26 снежня 2021 г., абвінавацілі паводле
артыкула 342 Крымінальнага кодэкса («Арганізацыя і падрыхтоўка дзеянняў, якія
груба парушаюць грамадскі парадак, альбо актыўны ўдзел у іх») і да суда
ўтрымлівалі ў СІЗА.
10 сакавіка 2022 г. суд прыгаварыў яго да 3
год абмежавання волі з накіраваннем у папраўчую ўстанову адкрытага тыпу (ПУАТ).
Пакаранне ён адбывае з 20 чэрвеня ў Мазыры. 5 кастрычніка беларускія
праваабаронцы ў чарговай сумеснай заяве прызналі яго палітычным зняволеным.
У мазырскім ПУАТ https://palesse.press/news.php?slug=5002 зараз адбываюць пакаранні 24 палітзняволеных.
Дасылаць паштоўкі і лісты П. Драздову
і іншым можна на адрас: ПУАТ № 21,
бульвар Юнацтва, 24, г. Мазыр, Гомельская вобл., 247783.
Сяргей Старавойтаў быў
затрыманы 24 чэрвеня 2022 года і абвінавачаны па тым жа самым артыкуле 342 КК –
за ўдзел у пратэстах 10 – 11 жніўня 2020 г., якія адбываліся з-за недаверу да
вынікаў галасавання, абвешчаных уладамі пасля прэзідэнцкіх выбараў. Суд
Фрунзенскага раёна Мінска асудзіў яго на 2 гады пазбаўлення волі ў калоніі
строгага рэжыму. Справу вяла суддзя Алена Бушава.
31 кастрычніка праваабаронцы прызналі Сяргея Старавойтава палітзняволеным.
Паштоўкі і лісты яму можна дасылаць на адрас: папраўчая калонія № 20, Міхалкаўскі сельсавет, 70, Мазырскі р-н,
Гомельская вобл., 247755. Цяпер у гэтай калоніі знаходзяцца пяць палітзняволеных.
У Мазырскім раёне, такім чынам, зараз адбываюць пакаранні 29 палітзняволеных. У цэлым у месцах зняволення ў Гомельскай вобласці іх налічваецца 188. Агульная колькасць палітзняволеных у Беларусі на сённяшні дзень – 1425.
На здымку: Пётр Драздоў
