>>
Раману Смолькіну замянілі пакаранне на больш
строгае – за тое, што ён спазніўся на лекцыю, спаў пад нарай і адмовіўся ад
прыборкі.
Раней ён адбываў пакаранне ў папраўчай
установе адкрытага тыпу № 9 у г. Віцебску. Перавод ў папраўчую калонію № 20 у
Міхалкаўскім сельсавеце Мазырскага раёна адбыўся ў гэтым месяцы.
47-гадовы Раман
Анатольевіч Смолькін з г. Салігорска Мінскай вобласці быў асуджаны судом
Салігорскага раёна 30 чэрвеня 2021 года. Яго пакаралі паводле артыкула 360
Крымінальнага кодэкса – “Абраза прадстаўніка ўлады”. Прычынай стаў каментарый,
напісаны ім 4 студзеня 2021 г. у сацыяльнай сетцы “У Кантакце”. У каментарыі
быў абражаны намеснік начальніка Салігорскага РАУС Салавей Сяргей Іванавіч, вядомы сваёй дзейнасцю супраць пратэстаў
пасля прэзідэнцкіх выбараў 2020 года. Суддзя Блоцкі Юрый Міхайлавіч прыгаварыў Рамана да 2-х год абмежавання волі з накіраваннем у папраўчую
ўстанову адкрытага тыпу (ПУАТ).
Пакаранне ў ПУАТ грамадзянін адбываў з 12
кастрычніка 2021 года. 23 лістапада праваабаронцы прызналі яго палітычным
зняволеным.
У пачатку 2022 г. адміністрацыя ПУАТ-9
накіравала ў суд прадстаўленне аб замене пакарання Раману Смолькіну на больш строгае – за “злоснае ўхіленне ад адбыцця
пакарання ў выглядзе абмежавання волі”. Ухіленнем, паводле арт. 55 Крымінальна-выканаўчага
кодэкса РБ, лічыцца, у прыватнасці, парушэнне парадку і ўмоваў адбывання
пакарання пасля вынясення афіцыйнага папярэджання. Папярэджанне выносіцца, калі
асуджаны мае не меньш трох спагнанняў за парушэнні. А парушэннямі Раману залічылі тое, што ён спазніўся
на лекцыю, спаў пад нарай і адмовіўся ад прыборкі.
Паводле арт. 55 Крымінальнага кодэкса, у
выпадку “злоснага ўхілення асуджанага ад адбыцця пакарання ў выглядзе
абмежавання волі” суд “можа замяніць абмежаванне волі пазбаўленнем волі з
разліку 1 дзень пазбаўлення волі за 2 дні абмежавання волі”.
14 лютага суд замяніў пакаранне палітвязню на
9 месяцаў пазбаўлення волі ў калоніі агульнага рэжыму. У канцы траўня ён быў
пераведзены ў СІЗА № 2 ў Віцебску, а ў ліпені – ў калонію № 20.
Акрамя Смольскага, у калоніі № 20 знаходзяцца яшчэ трое палітзняволеных: Ігар Аліневіч і Аляксей Драб з Мінску і Міхаіл Лінтоўскі з Мёрскага раёну
Віцебскай вобласці.
