У Гомельскай вобласці знаходзяцца больш за 170 палітзняволеных

Цімур Казачэнка 28.07.2022

>

173 чалавекі, якіх праваабаронцы прызналі палітычнымі зняволенымі, утрымліваюцца на сённяшні дзень у Гомелі, Мазырскім і Рэчыцкім раёнах. Сярод іх – 55 жанчын.

На Гомельшчыне існуюць 10 устаноў, падпарадкаваных Упраўленню па Гомельскай вобласці Дэпартамента выканання пакаранняў МУС РБ. Палітзняволеных трымаюць у шасці з іх. Гэта – следчы ізалятар № 3, тры папраўчыя калоніі (ПК) і дзве папраўчыя ўстановы адкрытага тыпу (ПУАТ).

У СІЗА-3 у Гомелі на цяперашні час знаходзяцца 94 палітзняволеныя, у тым ліку 12 жанчын. Сярод іх ёсць і ўжо асуджаныя, і тыя, хто абвінавачаны і ўзяты пад варту. Пераважная большасць з іх – жыхары Гомельскай вобласці (77 чалавек), ёсць таксама прывезеныя з Мінску і Гродна. З усіх месцаў зняволення ў краіне большая колькасць палітзняволеных толькі ў СІЗА-1 у Мінску – 167.

40 жанчын-палітзняволеных адбываюць пакаранне ў жаночай ПК-4 у Гомелі, 3 – у жаночай ПК-24 у г. п. Зарэчча Рэчыцкага раёна.

У ПК-20 у Міхалкаўскім с/с Мазырскага раёна знаходзяцца чатыры палітзняволеныя.

14 палітзняволеных адбываюць пакаранні ў ПУАТ-17 у Гомелі. У ПУАТ-21 у Мазыры іх 18.

Колькасць палітзняволеных змяняецца, напрыклад, у траўні ў Гомельскай вобласці іх было 175, а на сярэдзіну ліпеня – 171. Гэта звязана з тым, што некаторыя з іх адбываюць тэрмін пакарання і выходзяць на волю, некаторых пераводзяць у іншыя вобласці. У выпадку асуджэння грамадзян па палітычных матывах праваабаронцы прымаюць заявы аб прызнанні новых палітзняволеных.

Агульная колькасць асобаў у краіне, якія прызнаныя палітзняволенымі, на сённяшні дзень складае 1264 чалавекі.

На фота: Калонія № 24 у г. п. Зарэчча Рэчыцкага раёна.

Хто яны, рэчыцкія "экстрэмісты"?

Жорж Кунцэвіч 21.07.2022