Масавыя затрыманні футбольных заўзятараў у Мазыры. Што вядома на гэты час

Палеская Вясна 06.05.2021

>>

Пра 11 затрыманых у Мазыры 5 траўня паведамла прэсавая служба МУС. Паводле версіі сілавікоў, 10 хлопцаў, якіх затрымалі 4 траўня з дапамогай ГУБАЗіКу і САХР, бралі ўдзел у масавых беспарадках у жніўні 2020 года і з’яўляюцца ўдзельнікамі «каляфутбольнай групоўкі праварадыкальнай накіраванасці». Яшчэ адзін 54-гадовы затрыманы ў кола футбольных фанатаў не ўваходзіў.

Прэсавая служба ГУУС Гомельскага аблвыканкаму ў сваім відэа заявіла, што затрыманыя 11 жніўня мінулага году выкарыстоўвалі супраць міліцыянтаў газавыя балончыкі, кідалі ў іх камяні.

Палеская Вясна паразмаўляла ў Мазыры з сябрам большасці затрыманых. Ён пацвердзіў, што хлопцы і сапраўды заўзелі за мясцовы футбольны клуб «Славія», але не ведае з іхняга боку ніякіх праяваў правага радыкалізму. На шматтысячных шэсцях, якія адбываліся ў Мазыры пасля 14 жніўня і ў верасні мінулага году, іх не было заўважна. Магчыма яны ўдзельнічалі ў мірных сходах, якія вечарамі адбываліся ў раённым цэнтры ў першыя дні пасля выбараў.

9, 10, 11, 12 і 13 жніўня ў Мазыры штовечар збіраліся людзі спачатку на плошчы Леніна ў цэнтры горада, а потым у густанаселеным раёне на бульвары Юнацтва. Спачатку яны спрабавалі дамагчыся агалошвання сапраўдных вынікаў выбараў па кожным участку. Пры гэтым яны не рабілі анічога, што магло б зрабіць іхнія сходы не мірнымі – не псавалі маёмасць і транспарт, не рабілі агрэсіўных выпадаў у бок мінакоў альбо прадстаўнікоў сілавых структураў, якія штовечар таксама былі на месцах збору. Больш таго, 10 жніўня, калі міліцыянты і вайскоўцы ўнутраных войскаў выцеснілі ўдзельнікаў мірнага сходу з плошчы Леніна на лесвіцу, якая ідзе на прылеглую гару, людзі адтуль пачалі скандаваць лозунг «Міліцыя з народам!»

Міліцыянты ж разам з вайскоўцамі ўнутраных войскаў ужылі да ўдзельнікаў мірных выказванняў меркаванняў нематываваны гвалт. Яны пачалі жорстка затрымліваць і збіваць удзельнікаў мірных сходаў, якія не супраціўляліся, часта ляжалі на доле, прыкрываючыся ад шматлікіх хаатычных удараў гумавымі дручкамі і пінкоў нагамі. У інтэрнэт трапілі шматлікія відэазапісы гэтых гвалтоўных дзеянняў сілавікоў. Пазней высветлілася, што да тых, каго ім удалося затрымаць, у памяшканнях Мазырскага РАУС ужываліся страшэнныя катаванні, іх мэтанакіравана збівалі, здзекваліся з іх, прыніжалі маральна, пагражалі звальненнямі з працы, працяглымі тэрмінамі турэмнага зняволення.

___________________________________________

Чытайце таксама: 

«А цяпер вядзіце сабак!» Жыхар Калінкавічаў распавёў пра катаванні ў мазырскай міліцыі

___________________________________________


___________________________________________

Чытайце таксама:

«Гэта былі свае ж – пхоўскія!» Жыхар Мазыра распавёў пра катаванні ў мясцовым РАУС (ВІДЭА)

___________________________________________

11, 12 і 13 жніўня ўдзельнікі мірных сходаў, калі бачылі, што дзеянні сілавікоў робяцца агрэсіўнымі, пачыналі бараніцца, каб не даць сябе затрымаць. У выніку машыны, на якіх яны ажыццяўлалі напады на пратэстоўцаў, закідвалі камянямі. Гэта цяпер праваўжывальныя органы трактуюць як масавыя беспарадкі і гвалт у дачыненні да міліцыі. Раней цягам васьмі месяцаў ад жніўня мінулага году крымінальных справаў паводле факту масавых беспарадкаў у Мазыры не заводзілася.  

Увосень за тое, што 11 жніўня 2020 году кінулі камяні ў бок аўтамабіля ўнутраных войскаў у Мазыры асудзілі дваіх непаўнагадовых хлопцаў Юрыя Мельчанку і Сяргея Лягуна. Іх прызналі вінаватымі ва ўдзеле не ў масавых беспарадках, а ў групавых дзеяннях, якія груба парушаюць грамадскі парадак і спалучаныя з непадпарадкаваннем патрабаванням супрацоўнікаў органаў унутраных справаў.

Затрыманне маладзёна ў Мазыры 4 траўня 2021 года. Скрын-шот з відэа МУС. 

Як паведаміў Палескай Вясне сябар некалькіх затрыманых, іх затрымлівалі людзі ў цывільным адзенні альбо ў нейкай форме без апазнавальных знакаў, у масках на тварах. Пры гэтым яны не прадстаўляліся, не называлі сваіх пасадаў, званняў і прозвішчаў, не паведамлялі прычынаў альбо падставаў для затрымання і не прапанавалі дабраахвотна з імі прайсці. Наадварот, яны без папярэджання ўжывалі фізічную сілу, валілі людзей на зямлю, заламлівалі рукі, прыціскалі да зямлі галовы. Гэта бачна нават на выкладзеных МУС відэа.


Затрыманне маладзёна ў Мазыры 4 траўня 2021 года. Скрын-шот з відэа МУС.

Суразмоўца Палескай Вясны паведаміў, што першым затрыманым, пра якога яму стала вядома. Быў Данііл Скіпальскі. Ён выйшаў з пад’езду, каб ісці на працу і адразу ж быў жорстка затрыманы. Менавіта ён фігуруе ў двух эпізодах на відэа МУС. Прычым, затрыманы ён быў у адзенні. Паведамляе пра ўдзел у жнівеньскіх пратэстах у машыне і каля нейкіх драўляных дзвярэй таксама ў адзенні. Але на фотакалажы, выкладзеным тэлеграм-каналам «ГУБОП», ён каля тых самых дзвярэй распрануты.  


Данііл СКІПАЛЬСКІ пасля затрымання 4 траўня. Скрын-шоты з відэа МУС.

Сябар Данііла, з якім размаўляла Палеская Вясна, звярнуў увагу, што ягонае маўленне на відэа моцна адрозніваецца ад ягонай штодзённай размовы – ён заікаецца, кепска выгаворвае некаторыя словы. Таксама кідаецца ў вочы надрыўны голас іншага затрыманага з МУСаўскага відэа. А аднаго з затрыманых нават увогуле не змясцілі на калажы, выкладзеным у ТГ-канале «ГУБОП».


Калаж з тэлеграм-канала gubopRB

У дзень затрымання суседзі, якія сталі яго сведкамі, пра гэта паведамілі маці Данііла. А праз некаторы час да яе прыйшлі людзі ў цывільным і прад’явілі нейкую паперу. Яна ад хвалявання не здолела разабраць сэнс паперы і папрасіла патлумачыць. Ёй паведамілі, што будуць праводзіць ператрус у кватэры. Сілавікі, абшукваючы памяшканні, пыталі ў маці пра нейкую зялёную байку. Але такой не знайшлі. Яны агледзелі ноўтбук, але там таксама не аказалася нічога, што б іх зацікавіла, таму яны яго не забіралі. З кватэры забралі толькі некалькі налепак з фанацкай сімволікай клуба «Славія» і выявай герба «Пагоня». Паводле інфармацыі, якую маці Данііла Скіпальскага ўдалося даведацца ад супрацоўнікаў праваўжывальных органаў, Данііла затрымалі ў парадку артыкула 108 (паводле непасрэдна ўзніклага падазрэння ў здзяйсненні злачынства) і затрымалі на 72 гадзіны, а вінавацяць яго папярэдне паводле артыкулу 342.

Палескай Вясне ўдалося высветліць імёны яшчэ васьмі затрыманых. Гэта Вадзім Свінцецкі, Сяргей Гадыеў, Аляксандр Сузько, Мікіта Бандарэнка, Віталь Мелех, Эдгард Максіменка, Павел Дворак, а таксама 54-гадовы Уладзімір Панфіленка, які не належыць да фанацкага руху. Станам на 6 траўня яны знаходзяца ў ІЧУ Мазырскага РАУС. Перадачы для іх не прымаюць. 

22 чэрвеня на світанні…

Жорж Кунцэвіч 09.06.2022