Старшыні, дырэктары і начальнікі. Каго райсавет у Рэчыцы палічыў народам і адправіў на «народны сход»

Андрусь ГАЁВЫ 09.02.2021

У спісе тых, хто паедзе прымаць прапанаваныя Лукашэнкам праграмы ад Рэчыцкага раёну, пазначаныя 16 прозвішчаў. Усе 16 – рознага ўзроўню кіраўнікі.


Ілюстрацыйнае фота. Фота: dneprovec.by.

Нягледзячы на тое, што Лукашэнка спрабаваў падаць так званы «Усебеларускі народны сход» як пляцоўку для грамадскага дыялогу, нікога, хто б у Рэчыцы і раёне быў не згодны з непразрыстасцю выбараў, з гвалтам супраць беларусаў, які распачаўся пасля абвяшчэння іх вынікаў, са смерцямі ўдзельнікаў мірных пратэстаў, з няспыннымі рэпрэсіямі за палітычныя погляды, у тым ліку і ў Рэчыцы, на гэты сход не запрасілі. Туды прызначылі толькі тых, хто непасрэдна працуе ва ўладнай вертыкалі альбо наўпрост ад яе залежыць.

У размовах з жыхарамі Рэчыцы высвятляецца, што яны не ведаюць нават прозвішчы большасці тых, каго мясцовы райсавет без нейкага шырокага абмеркавання з грамадскасцю прызначыў быць удзельнікамі сходу. Зацьвярджэнне тых, хто паедзе ў Мінск 11 лютага адбылося на сесіі раённага савету дэпутатаў, якія атрымалі дэпутацкія мандаты у 2018 годзе на такіх самых непразрыстых выбарах, як і тыя, якія прайшлі летась у жніўні.

Самы высокі прадстаўнік рэчыцкага «народу» на тым «усебеларускім сходзе» – гэта старшыня мясцовага райвыканкаму Віталь Панчанка. Той самы, які ў жніўні, калі жыхары горада на мірным шэсці дамагліся выхаду прадстаўнікоў улады да пратэстоўцаў, адмовіўся размаўляць з рэчычанамі і сыйшоў у будынак райвыканкаму, заявіўшы, што яму трэба даіць кароў.

Не адмовіў сабе ў задавальненні пажыць пару дзён у мінскіх гатэлях і старшыня мясцовага савету дэпутатаў (на сесіі якога абіраліся пасланцы) Рыгор Якушаў. Менавіта райсавет, які ён узначальвае, разам з райвыканкамам сфармаваў падчас леташняй выбарчай кампаніі раённую выбарчую камісію.

Былы старшыня гэтай самай раённай выбарчай камісіі і галоўны рэдактар раённай газеты «Дняпровец» Ігар Сяргееў таксама той самы «народ», які будзе збірацца ў Палацы рэспублікі 11 і 12 жніўня.

Іншыя «выхадцы з народу» прадстаўляюць так званы дырэктарскі корпус раёну. Гэта дырэктар ганлёвага камунальнага прадпрыемства «Торгсервис» Алег Бойка, дырэктар Рэчыцкага дзяржаўнага педагагічнага каледжа Людміла Ягорава, дырэктар саўгаса «Дзяржынскі-агра» Леанід Лешчанка, дырэктар школы-інтэрната для дзяцей з фізічнымі недахопамі Віктар Рудэнка, дырэктар Рэчыцкага метызнага заводу Віктар Самончык, дырэктарка Рэчыцкай школы № 7 Алена Скварцова, дырэктарка школы № 4 (той самай, дзе падчас галасавання на апошніх прэзідэнцкіх выбарах нават вокны залеплівалі плакатамі і шпалерамі, каб незалежныя назіральнікі не пабачылі, што адбываецца на ўчастку) Галіна Ушава, а таксама аж два цэлых генеральных дырэктары – акцыянернага таварыста «Рэчыцадрэў» Валерый Тулейка і свідравальнай кампаніі «Дэльта» Мікалай Чарнашэй. Апошняе прадпрыемства, дарэчы, фармальна з’яўляецца прыватным бізнесам Чарнашэя. Але сам ён неаднаразова атрымліваў медалі асабіста ад Лукашэнкі і цалкам лаяльны да яго, бо той дазваляе яму бесперашкодна зарабляць грошы. Вядомы тым, што ягонае прадпрыемства ўдзельнічала ў пабудове флагштоку летась у Гомелі.

Яшчэ трое прадстаўнікоў Рэчыцы маюць пасады з назваю «начальнік». Гэта начальнік фінансавага аддзелу райвыканкаму Таццяна Дзякун, начальнік мясцовага аддзелу дэпатратмента аховы Міністэрства ўнутраных справаў (з якога ў жніўні звальнялі супрацоўніц, што адважыліся выказаць свае палітычныя погляды праз удзел у мірных сходах грамадзян на вуліцах Рэчыцы) Ігар Каршакоў і начальнік Нафтагазаздабываючага ўпраўлення «Рэчыцанафта» Сяргей Ласіца.

І, нарэшце, яшчэ адзін прадстаўнік рэчыцкага «народу» не мае ў назве сваёй пасады словаў «дырэктар» альбо «начальнік», але ж усё роўна займае кіруючую пасаду ў дзяржаўнай установе – галоўны лекар мясцовай раённай лякарні Аляксандр Пузянкоў.

Невядома, чаму хаця б для стварэння бачнасці прадстаўніцтва розных пластоў грамадства ў Рэчыцы не ўключылі ў склад дэлегатаў збору якога-небудзь рабочага ці настаўніцу, як, напрыклад, гэта зрабілі ў Лоеве. Імаверна месцаў, разнараджаных зверху на раён, толькі і хапіла, каб іх здолелі падзяліць між сабою рознага кшталту кіраўнікі. 

22 чэрвеня на світанні…

Жорж Кунцэвіч 09.06.2022