Вылучэнцы на «Усебеларускі народны сход» з Лоева. Хто, за што і чаму?

Мікалай АНІСАВЕЦ 06.02.2021

30 снежня мінулага года на сессіі Лоеўскага райсавета быў зацверджаны спіс удзельнікаў так званага «VI Усебеларускага народнага сходу». У спісе 7 прозвішчаў прызначаных дэлегатаў.


Сесія Лоеўскага райсавета, на якой прызначылі дэлегатаў на сход. Фота: loevkraj.by

Ад імя Лоеўшчыны на форум падтрымкі Лукашэнкі паслалі Мікіту Гараева – галоўнага ўрача Лоеўскай цэнтральнай раённай бальніцы, Ігара Кісялёва – электразваршчыка КСУП «Малінаўка-агра»,  Раісу Каляда  – дырэктара Лоеўскага педагагічнага каледжу,  Канстанціна Лямешчанку – трактарыста Лоеўскага райжылкамгасу, Ірыну Пастухову – старшыню Лоеўскага раённага Савета дэпутатаў,  Вераніку Сіраж – настаўніцу дзіцячай школы мастацтваў,  Міхаіла Шаўчэнку – старшага інспектара 3 памежнай камендатуры «Лоеў» вайсковай часткі 1242.

Раённая газета «Лоеўскі край» ў сваім нумары за 8 студзеня паведамляла, што гэта першыя вылучэнцы і яшчэ два патэнцыйныя кандыдаты ў вылучэнцы вызначаны ў якасці рэзервовых. Хто гэтыя рэзервовыя кандыдаты – не паведамляецца і можна толькі здагадвацца. Не павядамляецца таксама,  хто рэкамендаваў да абрання гэтых дэлегатаў і з якой прычыны, якія наказы ім даваліся і ці даваліся наогул.

У большасці сваёй прызначаныя дэлегаты –  мала вядомыя на Лоеўшчыне людзі, бо ні разу яны не былі заўважаныя ў праяўленні ініцыятывы ў адстойванні інтарэсаў раёна, які зараз знаходзіцца ў глыбокім крызісе. Ніхто з іх ніколі не выказваў пратэсту, што ў нас няма сапраўдных выбараў на ўсіх узроўнях улады, ад прэзідэнта да дэпутата мясцовага савета. Наўрад ці ад кагосьці з іх можна чакаць, што яны ўзнімуць тыя пытанні, якія абвастрыліся ў мінулым годзе – праваое бязмежжа, гвалт сілавікоў супраць свайго ж народа, дзясяткі тысяч людзей, пацярпелых ад палітычных рэпрэсіяў, сотні палітычных зняволеных, тысячы найбольш актыўных людзей, якія вымушаныя былі з’ехаць з краіны, многія нават са сваімі бізнесамі.

 Заслуга ўсіх вылучэнцаў заключаецца толькі ў тым, што яны выходзяць на працу, спраўна выконваюць даручэнні, спушчаныя ім зверху і задаволены сваім жыццём.  Чаму ж тады іх вылучыла раённая ўлада ў якасці дэлегатаў гэтага праўладнага форума? Адказ, можна меркаваць, відавочны для ўсіх: гэтыя людзі патрэбныя, каб падтрымаюць цяперашні праўладны курс. Хаця гэты курс, як ужо добра зразумела,  вядзе нас усіх да далейшага паглыблення прававога бязмежжа, эканамічнага, сацыяльнага і палітычнага крызісу ў Беларусі. Для ўлады гэтыя вылучэнцы – надзейныя прыхільнікі.

22 чэрвеня на світанні…

Жорж Кунцэвіч 09.06.2022