У Мазыры асудзілі яшчэ трох супрацоўнікаў нафтаперапрацоўчага заводу

Палеская Вясна 04.11.2020

Мужчынаў затрымалі 2 лістапада, выклікаўшы позвамі ў РАУС у якасці сведкаў.


30 кастрычніка пяцёра супрацоўнікам Мазырскага нафтаперапрацоўчага завода выйшлі на алею, што вядзе да галоўнай прахадной прадпрыемства, і прастаялі там каля 20 хвілінаў, трымаючы ў руках плакаты з надпісамі «Колькі трэба ОМОНаўцаў, каб адкрыць засаўку?», «Колькі будзеце саджаць, каб завод спыніць?», «Супраць гвалту» і некалькі плакатаў з падпісам «+1». Пасля акцыі яны сыйшлі на працоўныя месцы і дзень працавалі. Увечары, калі змена раз’язджалася дамоў, дваіх з іх – тэхніка ўліку Таццяну Казловіч і эканаміста Мікалая Жлобу, затрымалі і 2 лістапада правялі над імі суды. Намесніца старшыні суда Мазырскага раёна Элеанора Ярмоленка прысудзіла Мікалаю Жлобу 10 сутак арышту, а Таццяне Казловіч 30 базавых вялічыняў штрафу.

На гэтыя судовыя паседжанні разам з некалькімі дзясяткамі супрацоўнікаў заводу мелі намер ехаць іншыя ўдзельнікі акцыі 30 кастрычніка. Але іх раніцай выклікалі ў аддзел кадраў заводу, дзе ўручылі позвы ў РАУС у якасці сведкаў. Супрацоўнікі міліцыі павезлі іх у РАУС, дзе і затрымалі ўжо ў якасці асобаў, у дачыненні якіх вядзецца адміністрацыйны працэс.

3 лістапада правялі суд над намеснікам начальніка ўстаноўкі вытворчасці серы Канстанцінам Янкіным. Суддзя Аляксандр Град пакараў адмыслоўца штрафам у 30 базавых вялічыняў (810 рублёў). 4 лістапада ў судзе Мазырскага раёна працягнулі расправу над неабыякавымі нафтаперапрацоўшчыкамі. Суддзя Юлія Мішчанка пастанавіла арыштаваць на 7 сутак начальніка вытворча-дыспетчарскага аддзелу Рэната Надршына. А суддзя Галіна Кніжонак-Максімава вынесла рашэнне аб арышце на 5 сутак інжынера-праграміста аддзела аўтаматызаваных сістэмаў кіравання тэхналагічнымі працэсамі Дзмітрыя Каменскага.

Суды над супрацоўнікамі Мазырскага НПЗ пракаментаваў кіраўнік Мазырскай філіі праваабарончага цэнтра «Вясна» Уладзімір Целяпун:

«Усе пяць судовых працэсаў, якія адбыліся апошнімі днямі паказалі, што суддзі проста выконваюць нейкую працэдуру, загадзя ўзгоднены рытуал, зусім не жадаючы разбірацца ў юрыдычных аспектах справаў. Міліцыянты пішуць у пратаколах, што чалавек выказваў сваё стаўленне да вынікаў выбараў, а ён стаяў з плакатам “Супраць гвалту”. Паводле ўсіх юрыдычных нормаў – гэта нагода выправіць справу на дадатковае разбіральніцтва, бо неадпавядаюць рэчаіснасці ключавыя высновы аб’ектыўнага боку абвінавачвання. І на гэта звяртала ўвагу адвакатка. Але – марна! Ды і само прыняцце пастановы адбываецца дэманстратыўна фармальна – суддзі нават не сыходзяць у дарадчы пакой, а зачытваюць загадзя падрыхтаваную пастанову, тэкст якой, відавочна, складаўся яшчэ да таго, як суддзя пачуў акалічнасці справы ад яе ўдзельнікаў і адвакатаў. Такое дэманстратыўнае ігнараванне юрыдычных патрабаванняў паказвае, што законы ў краіне перасталі дзейнічаць. Прычым беззаконне чыняць тыя, хто нібыта мусіў бы стаяць на варце законнасці»