>
Стала вядома, што палітзняволены Мікіта Сілівон з Мазыра, які знаходзіўся ў гомельскім
СІЗА-3, цяпер адбывае пакаранне ў калоніі.
Яму можна дасылаць паштоўкі і лісты на адрас: папраўчая калонія № 3, г. п. Віцьба,
Віцебскі р-н, Віцебская вобл., 211322. На сённяшні дзень вядома пра 70
палітзняволеных, якія знаходзяцца ў гэтай калоніі.
Месцазнаходжанне яшчэ аднаго палітзняволенага
– Яўгена Клімава з Петрыкава, які
раней таксама ўтрымліваўся ў гомельскім СІЗА, праваабаронцамі удакладняецца.
25-гадовы майстар Яўген Клімаў, а таксама
42-гадовы жыхар Петрыкава Віктар Бедрый з’яўляліся
адміністратарамі Тэлеграм-канала "Петрыкаў 97%". Стваральнікам каналу быў Я.
Клімаў. 9 чэрвеня 2021 г. суд Чыгуначнага раёна г. Гомеля прызнаў гэты канал
экстрэмісцкім, а 9 лістапада 2021 года МУС прызнаў экстрэмісцкім фарміраваннем
групу грамадзян, якія былі аб’яднаны гэтым каналам. У гэты ж дзень Я. Клімаў
быў затрыманы на 3 сутак, а 30 снежня 2021 г. зноў затрыманы і змешчаны ў СІЗА.
Акрамя таго, ён быў абвінавачаны ў тым, што скапіраваў
з Тэлеграм-канала Ne*ta і размясціў у
інтэрнеце паведамленне пра АМАП, і тым самым "распальваў сацыяльную варожасць".
За гэта
Я. Клімаў асуджаны да 5 гадоў пазбаўлення волі ў калоніі ўзмоцненага
рэжыму. Прысуд яму вынес Гомельскі абласны суд 25 сакавіка 2022 г. па
двух артыкулах Крымінальнага кодэкса: 130 – "Распальванне расавай,
нацыянальнай, рэлігійнай ці іншай сацыяльнай варожасці альбо варажнечы" (частка
1), і 361-1 – "Стварэнне экстрэмісцкага фарміравання альбо ўдзел у ім" (ч. 1). Справу
вёў суддзя Руслан Царук, дзяржаўная
абвінаваўца – Юлія Канапелькіна (якая
запытвала для падсуднага 6 гадоў пазбаўлення волі).
20 красавіка праваабаронцы прызналі Клімава
палітычным зняволеным, паколькі, як было адзначана ў іх заяве, грамадзянін не
заклікаў да гвалту, а яго дзеянні не прынеслі і не маглі прынесці цяжкіх
наступстваў.
У верасні КДБ уключыў Яўгена Клімава ў спіс асобаў, "датычных да
тэрарыстычнай дзейнасці".
На
здымку: Яўген Клімаў.
