Яшчэ адзін палітзняволены ў палескім рэгіёне – Сяргей Міраеўскі са Светлагорска

Палеская Вясна 04.03.2021

>

3 сакавіка правабарончая супольнасць Беларусі яшчэ восем чалавек прызнала палітычнымі зняволенымі. Сярод іх ёсць і жыхар Светлагорска.


Сяргей МІРАЕЎСКІ.

Сяргея Міраеўскага  21 снежня 2020 года суддзя суда Светлагорскага раёна Аляксандр Валодзькін прызнаў вінаватым у арганізацыі групавых дзеянняў, якія груба парушаюць грамадскі парадак. Яму ставілася ў віну тое, што ён у каментарах у тэлеграм-канале «Светлогорск для жизни» прапаноўваў жыхарам Светлагорска збірацца не на цэнтральнай плошчы горада, дзе праблемна схавацца ад гвалту сілавікоў, а ў раёне гандлёвага цэнтру «Бярозкі», да якога прымыкае лясны масіў, старацца трымацца вялікімі групамі па 70 – 100 чалавек, блакаваць аўтамабілямі пад’езды да месцаў мірных сходаў, каб замінаць прыбыццю вялікай колькасці карных падраздзяленняў, калі міліцыянты будуць ужываць гвалт і пераследаваць людзей у дварах мікрараёнаў, Міраеўскі раіў самім ствараць засады і затрымліваць міліцыянтаў, здымаючы з іх спецвопратку і фіксуючы пластыкавымі сцяжкамі альбо скотчам.

Суддзя Валодзькін пакараў Сяргея Міраеўскага 2,5 гадамі абмежавання волі з накіраваннем ва ўстанову адкрытага тыпу. Нягледзячы на тое, што так званая арганізацыя групавых дзеянняў, якія груба парушаюць грамадскі парадак, аднсіцца да менш цяжкіх злачынстваў, а ў Сяргея Міраеўскага двое малалетніх дзетак, абласны суд пакінуў прысуд Валодзькіна без зменаў. Днямі Сяргея адарвалі ад сям’і і накіравалі ва ўстанову адкрытага тыпу.

У сумеснай заяве дзевяці правабарончых арганізацыяў Беларусі 3 сакавіка Сяргей Міраеўскі прызнаны палітычным зняволеным. Пераслед Сяргея Міраеўскага, гэтак жа, як і пераслед іншых сямі чалавек, якіх прызналі палітзняволенымі 3 сакавіка, праваабаронцы лічаць, «як палітычна матываваны пераслед у сувязі з рэалізацыяй імі свабоды мірных сходаў і выказвання свайго меркавання адносна абвешчаных вынікаў выбараў Прэзідэнта Рэспублікі Беларусь».

Праваабаронцы запатрабавалі неадкладна вызваліць палітычных зняволеных і спыніць іх крымінальны пераслед.   

_____________________________________________

Станам на 4 сакавіка ў Беларусі 270 палітвязняў

_____________________________________________

22 чэрвеня на світанні…

Жорж Кунцэвіч 09.06.2022