>
Як
стала вядома напрыканцы траўня, палітычны зняволены Яўген Прапольскі, які да
гэтага знаходзіўся ў Бабруйску, пераведзены ў калонію № 20 у Міхалкаўскім
сельсавеце Мазырскага раёна.
29-гадовы зваршчык Мінскага трактарнага заводу
Яўген Прапольскі быў затрыманы 29
верасня 2020 года, калі выходзіў з інтэрната на сустрэчу з дзяўчынай. Пры
затрыманні ў яго знашлі электрашокер, які ён насіў для самаабароны. На судзе ён
распавёў, што яго прымушалі пісаць «чыстасардэчнае прызнанне», і пры гэтым білі
гэтым электрашокерам.
Ён і яшчэ 10 чалавек былі абвінавачаны па
адной справе за ўдзел "у Тэлеграм-чаце радыкальнага накірунку". Яўгену
прад’явілі абвінавачанні па двух артыкулах Крымінальнага кодэкса: частка 3 арт.
218 – «Наўмысныя знішчэнне альбо пашкоджанне маёмасці, здзейсненыя
агульнанебяспечным спосабам альбо якія пацягнулі прычыненне шкоды ў буйным
памеры», і частка 2 арт. 293 – «Удзел у масавых беспарадках». Дзяржаўнае тэлебачанне
паказала яго ў прапагандысцкім роліку аб тым, як міліцыя "ідэнтыфікуе
адміністратараў ананімных чатаў і ўдзельнікаў пратэстаў".
Яўген быў змешчаны ў турму № 4 ў Магілёве. 5
лістапада 2020 г. праваабаронцы прызналі яго і іншых абвінавачаных па гэтай справе
палітзняволенымі.
Сваю віну ў судзе, які цягнуўся амаль месяц,
грамадзянін у поўным аб’ёме не прызнаў. 19 ліпеня 2021 г. суд Ленінскага раёна
Мінска прыгаварыў Яўгена Прапольскага да 8 гадоў пазбаўлення волі ў калоніі
ўзмоцненага рэжыму. Прысуд вынес суддзя Дзмітрый Астапенка, дзяржаўным абвінаваўцам быў пракурор Аляксандр Рамановіч.
У сярэдзіне снежня 2021 г. стала вядома аб
пераводзе Яўгена ў калонію № 2 ў г. Бабруйску (Магілёўская вобласць). У жніўні
2022 г. стала вядома, што яго беперапынна ўтрымлівалі ў штрафным ізалятары 2
месяцы. У снежні 2022 г. – змясцілі на месяц у памяшканне камернага тыпу.
Агулам ён правёў 130 сутак у ШІЗА і 4 месяцы ў ПКТ.
У сярэдзіне траўня стала вядома, што
палітзняволены ўтрымліваўся ў ізалятары часовага ўтрымання Бабруйскага РАУС у
чаканні яшчэ аднаго суда, потым – у СІЗА № 5 у Бабруйску.
У цяперашні час яму можна напісаць на адрас: Прапольскаму Яўгенію Уладзіміравічу,
папраўчая калонія № 20, Міхалкаўскі сельсавет, 70, Мазырскі раён, Гомельская
вобласць, 247755. Зараз у гэтай калоніі знаходзіцца, такім чынам, 5 палітзняволеных. Агульная
колькасць палітзняволеных у Беларусі на сённяшні дзень – 1491.
