>
5 жніўня праваабаронцы Беларусі прынялі
сумесную заяву аб прызнанні палітычнымі зняволенымі яшчэ 11 чалавек. Сярод іх –
Дзмітрый Брэль з Гомельскай
вобласці.
26-гадовы Дзмітрый Брэль у лістападзе 2021 г. асуджаны судом Рэчыцкага раёна паводле часткі 1
артыкула 342 Крымінальнага кодэкса – «Арганізацыя і падрыхтоўка дзеянняў, якія
груба парушаюць грамадскі парадак, альбо актыўны ўдзел у іх». Гаворка ідзе пра
акцыі, якія адбываліся пасля прэзідэнцкіх выбараў у жніўні 2020 года. Суддзя Іванюценка Станіслаў прыгаварыў
грамадзяніна да 1 года і 3 месяцаў пазбаўлення волі ў калоніі агульнага рэжыму.
Пасля абскарджання 19 студзеня 2022 г. у
Гомельскім абласным судзе прысуд быў пакінуты без змяненняў.
Іншыя 10 грамадзян, якія прызнаныя
палітзняволенымі 5 жніўня, таксама пераследуюцца паводле часткі 1 артыкула 342
КК.
У сваёй заяве праваабаронцы адзначаюць, што
свабода мірных сходаў гарантаваная артыкулам 21 Міжнароднага пакта аб
грамадзянскіх і палітычных правах. Выступы грамадзян мелі мірны характар, былі
выкліканы недаверам да вынікаў прэзідэнцкіх выбараў і не ўяўлялі пагрозы для
грамадскай ці нацыянальнай бяспекі. Аднак спецпадраздзяленні МУС ужывалі ў
адносінах да дэманстрантаў непрапарцыйна жорсткія меры з выкарыстаннем
спецсродкаў і зброі. У сувязі з гэтым праваабаронцы лічаць, што пераслед
грамадзян за «грубае парушэнне
грамадскага парадку» палітычна матываваны.
На сённяшні дзень у краіне налічваецца 1262
палітзняволеных, з іх 171 знаходзяцца ў месцах зняволення ў Гомельскай вобласці.
На
здымках:суддзя Станіслаў Іванюценка.
