>>
У Гомелі ў дзень народзінаў будуць судзіць украінскую валанцёрку, якая знікла летам мінулага года па дарозе ў Мазыр, піша "Наша Ніва". Наталлі Захаранцы пагражае да 15 гадоў зняволення за "шпіянаж".
Жанчына перастала выходзіць на сувязь у мінулым ліпені, калі прыехала ў беларускі Мазыр. Трывогу падняла дачка валанцёркі, але звестак з афіцыйных органаў так і не атрымала.
Суд па справе жанчыны прызначаны ў Гомельскім абласным судзе на 15 лютага. Разам з Наталляй Захаранкай будуць судзіць яе знаёмую Ларысу Крупу за "неданясенне пра злачынства".
Пасля пачатку вайны валанцёрка перавозіла ў ЕС і Беларусь украінскіх уцекачоў, перадавала дакументы і лекі.
Пра тое, што грамадзянка Украіны Наталля Захаранка (Захаренко Наталія Володимирівна) знікла пасля перасячэння польска-беларускай мяжы, “Радыё Свабода” расказалі знаёмыя жанчыны.
Па словах суразмоўцы, да 2021 года Наталля Захаранка рэгулярна ездзіла ў Беларусь. Там яна гандлявала на гомельскім рынку. Прадавала прыправы, туалетную паперу, гарчыцу і іншыя ўкраінскія харчовыя і прамысловыя тавары.
«На нашым рынку «Цэнтральным» яе ўсе ведалі, але гады два яна ўжо не з'яўлялася. Зразумела, чаму. Ідзе вайна, мяжа на замку, нявыгадна вазіць праз Польшчу тыя ж спецыі і розную драбязу. З Гомля яна везла ў Чарнігаў беларускія прадукты – аўсянку, згушчанае малако і іншае», – пракаментавала Свабодзе на ўмовах ананімнасці Марына (імя змененае ў мэтах бяспекі), якая гандлюе на гомельскім рынку і цяпер.
Вядома таксама, што Наталля Захаранка ездзіла ў Мазыр да сястры. Таксама яна брала па дарозе перадачы, дакументы, дапамагала перасякаць мяжу іншым людзям – з Украіны праз Польшчу ў Беларусь і назад. У тэматычных чатах перавозак яна пакінула шмат абвестак. Людзі актыўна карысталіся яе паслугамі.
З апошніх абвестак Наталлі ў адмысловым чаце – пра тое, што 10 ліпеня яна едзе з Чарнігава ў Мазыр праз Луцк, Роўна, Жытомір, польскія гарады і Берасце. Яна прапаноўвала ўзяць пасажыраў, перадачы, пасылкі, дакументы, катоў і сабак. Назад украінка збіралася ехаць 21 ліпеня. І знікла, пісала «Палеская вясна».