Дагэтуль нічога невядома пра чарнігаўскую прадпрымальніцу, якая знікла па дарозе ў Мазыр

Жорж Кунцэвіч 28.07.2023

>

Жыхарка ўкраінскага Чарнігава Наталля Захаранка не адгукаецца з 17 ліпеня. Яна паехала да сястры ў Мазыр.

Пра тое, што грамадзянка Украіны Наталля Захаранка (Захаренко Наталія Володимирівна) знікла пасля перасячэння польска-беларускай мяжы, Пра гэта “Радыё Свабода” расказалі знаёмыя жанчыны.

Па словах суразмоўцы, да 2021 г. Наталля Захаранка рэгулярна ездзіла ў Беларусь. Там яна гандлявала на гомельскім рынку. Прадавала прыправы, туалетную паперу, гарчыцу і іншыя ўкраінскія харчовыя і прамысловыя тавары.

«На нашым рынку «Цэнтральным» яе ўсе ведалі, але гады два яна ўжо не з'яўлялася. Зразумела, чаму. Ідзе вайна, мяжа на замку, нявыгадна вазіць праз Польшчу тыя ж спецыі і розную драбязу. З Гомля яна везла ў Чарнігаў беларускія прадукты – аўсянку, згушчанае малако і іншае», – пракаментавала Свабодзе на ўмовах ананімнасці Марына (імя змененае ў мэтах бяспекі), якая гандлюе на гомельскім рынку і цяпер.

Вядома таксама, што Наталля Захаранка ездзіла ў Мазыр да сястры. Таксама яна брала па дарозе перадачы, дакументы, дапамагала перасякаць мяжу іншым людзям – з Украіны праз Польшчу ў Беларусь і назад. У тэматычных чатах перавозак яна пакінула шмат абвестак. Людзі актыўна карысталіся яе паслугамі.

З апошніх абвестак Наталлі ў адмысловым чаце – пра тое, што 10 ліпеня яна едзе з Чарнігава ў Мазыр праз Луцк, Роўна, Жытомір, польскія гарады і Берасце. Яна прапаноўвала ўзяць пасажыраў, перадачы, пасылкі, дакументы, катоў і сабак. Назад украінка збіралася ехаць 21 ліпеня. І знікла.

«Яна 13 ліпеня адпраўляла пасылку маім бацькам, мы былі на сувязі.  Тады яшчэ было ўсё добра», – піша адна з карыстальнікаў чату.

Апошні допіс жанчыны ў фэйсбуку датаваны 15 ліпеня.

«15 ліпеня я з ёй перапісвалася. Але 20 ліпеня я мусіла перадаць пасылку, але яе ніхто не забраў», – удакладняе іншая карыстальніца.

Таксама, паводле паведамленняў у чаце, Наталля абяцала забраць пасажыраў з Беларусі ва Украіну, чаго таксама не адбылося.

Суразмоўцы дапускаюць, што жанчыну маглі затрымаць сілавікі, якіх зацікавілі яе частыя паездкі з Чарнігава ў Мазыр. У мазырскім ІЧУ і гомельскім СІЗА на пытанні аб магчымым арышце ўкраінкі адказваць адмовіліся.