>
У Беларусі на цяперашні час налічваецца 169 палітзняволеных-жанчын, што складае 12% ад агульнай колькасці палітзняволеных. 4 з іх знаходзяцца ў калоніі № 24 у г. п. Зарэчча Рэчыцкага раёна. Іх можна падтрымаць і павіншаваць з 8 сакавіка паштоўкай, лістом альбо тэлеграмай.
Гэта Алена Гнаук, Вікторыя Кульша, Алена Маўшук і Паліна Шарэнда-Панасюк. Яны асуджаны за “паклёп у дачыненні да прэзідэнта”, “абразу прэзідэнта”, “абразу прадстаўніка ўлады” і таму падобных “злачынствах” на тэрміны ад 4 да 6,5 гадоў зняволення.
Трох з іх – Алену Гнаўк, Вікторыю Кульшу і Паліну Шарэнду-Панасюк –ужо падчас адбывання пакарання асудзілі зноў: за “злоснае непадпарадкаванне адміністрацыі калоніі”. Прычым у адносінах да В. Кульшы і П. Шарэнды-Панасюк гэта зрабілі двойчы. Такім чынам палітзняволеным павялічваюць тэрміны знаходжання за кратамі.
Гнаук Алене Пятроўне, Кульшы Вікторыі Аляксандраўне, Маўшук Алене Уладзіміраўне і Шарэндзе-Панасюк Паліне Сяргееўне можна напісаць на адрас: ПК № 24, вул. Вытворчая, 44, г. п. Зарэчча, Рэчыцкі раён, Гомельская вобл., 247526.
