>>>>
Яшчэ два жыхары гомельскага Палесся ўключаны ў “Пералік
грамадзян, замежных грамадзян або асоб без грамадзянства, якія маюць дачыненне
да экстрэмісцкай дзейнасці”.
На гэты раз да “экстрэмістаў” залічылі жыхарку Жыткавіч Дар’ю
Іксанаву, студэнтку-скульптарку Акадэміі мастацтваў. Вядома, што
ў 2020 годзе Дар'ю затрымлівалі на 15 сутак. Тады яна была студэнткай каледжа.
А 12 чэрвеня ў судзе Цэнтральнага раёна Мінска над Дар'яй
адбыўся суд па крымінальнай справе. Суддзя Юльяна Шчэрба прызнала
дзяўчыну вінаватай ва ўдзеле ў паслявыбарчых акцыях пратэсту і прызначыла ёй два
з паловай гады абмежавання волі без накіравання ў папраўчую ўстанову
("хатняя хімія"). Яе вызвалілі ў зале суда.
У спісе таксама жыхар вёскі Нагорныя Мазырскага раёна
Уладзімір Машкоўскі.
5 красавіка ў судзе Мазырскага раёна прайшоў судовы працэс па справе, звязанай з
палітычнымі падзеямі ў краіне. На гэты раз чалавек, якога судзілі – Уладзімір
Машкоўскі. Яго абвінавацілі паводле чатырох артыкулаў Крымінальнага кодэкса.
Грамадзяніну прад’явілі абвінавачанні паводле часткі 1
артыкула 342 – «Арганізацыя і падрыхтоўка дзеянняў, якія груба парушаюць
грамадскі парадак, або актыўны ўдзел у іх» (маюцца на ўвазе мірныя сходы
пратэстнага характару), ч. 2 арт. 367 – (Паклёп у дачыненні да прэзідэнта), ч.
1 арт. 368 – (Абраза прэзідэнта), і арт. 369 – (Абраза прадстаўніка
ўлады). Справу разглядала прызначаная Лукашэнкам на пасаду суддзі Валянціна
Новікава.
Які прысуд вынесены Машкоўскаму – дагэтуль невядома.
