>
Стала
вядома аб новым затрыманні ў Хойніках. 8 жніўня ГУБАЗіК апублікаваў відэа, на
якім бачна, як амапаўцы на вуліцы груба накінуліся на маладога мужчыну і
зацягнулі яго ў бус.
"Віна" Аляксандра ў тым, што ён паведамляў аб
перамяшчэнні расейскай вайсковай тэхнікі і дасылаў фота ў ТГ-каналы, абвешчаныя
«экстрэмісцкімі», піша “Флагшток”.
"У мяне знаёмыя ў розных гарадах Украіны, простыя людзі. Для мяне гэтая вайна стала шокам, я цяжка перажываў, дрэнна спаў, хацеў хоць неяк дапамагчы людзям. Думаў, што з імі будзе, ці дажывуць яны да заўтра", - патлумачыў Аляксандр на "пакаянным відэа", якое яго прымусілі запісаць сілавікі.
Тым часам сёння,
9 жніўня, у Гомельскім абласным судзе пачнецца разгляд крымінальнай
справы ў дачыненні да палітзняволенай жыхаркі Мазыра Ганны Пышнік (Чымпаеш).
Яе затрымалі 22 сакавіка нібыта за перадачу відэа з
перасоўваннем ваеннай тэхнікі (верталёты) ў адзін з тэлеграм-каналаў.
