У Рэчыцы збіраюць подпісы пад петыцыяй пра абуладкаванне вуліцы, па якой дзеці ходзяць у школу
Палеская Вясна
09.03.2020
Раённыя ўлады,
як вынікае з іх адказаў, не зусім разумеюць гарадскую лагістыку і абуладкавалі
не тую вуліцу, якую трэба было б. Гараджане склалі петыцыю, каб улады давялі да
ладу патрэбную.
Жыхары двух новых мікрараёнаў у заходняй частцы Рэчыцы
патрабуюць пабудовы там школы і дзіцячага садка. Але мясцовыя ўлады
сцвярджаюць, што ў горадзе дзецям ёсць дзе вучыцца і выхоўвацца, варта толькі
перанакіраваць іх у незапоўненыя ўстановы іншых частак горада. На сустрэчы з
жыхарамі, якая адбылася ў студзені,
бацькі ўзнялі пытанне пра бяспеку вуліц, якімі дзеці з новых шматпавярховых
мікрараёнаў ідуць да школы ў раёне прыватнага сектару. Улады даслалі адказ, але
не пра тыя вуліцы. І цяпер жыхары горада збіраюць подпісы пад электронным
зваротам, каб прымусіць улады звярнуць увагу на патрэбную вуліцу – імя Хлуса.
У адказе за подпісам намесніка старшыні райвыканкама Аляксандра Горбача, які атрымала
экс-кандыдатка ў дэпутаты Палаты прадстаўнікоў Таццяна Ласіца, распавядаецца, якія намаганні прыклалі ўлады, каб давесці
да ладу вуліцу імя Міцкевіча. Чамусьці райвыканкаму здаецца, што з новых
мікрараёнаў з назвамі «30А» і «15»
найзручней да школы № 9, куды скіраваныя малыя жыхары гэтых раёнаў, дайсці па
вуліцы Міцкевіча.
Аляксандр Горбач апісвае, што на вуліцы Міцкевіча
ўсталявалі ажно тры дапаўняльныя асвятляльныя прылады. На так званым «бацькоўскім
маршруце» - адмысловым рэйсе аўтобуса, які збірае дзетак з новых мікрараёнаў і
развозіць іх па старых школах і садках, у 7 гадзін 11 хвілін зрабілі прыпынак
каля 9-й школы на вуліцы Міцкевіча.
Гэтая вуліца злучае старую частку Наварэчыцкага
мікрараёна з раёнам прыватнага сектара, дзе месціцца 9-я школа. А вось з новых
мікрараёнаў, якія раскінуліся значна ўсходней за Наварэчыцкі, найкарацейшы шлях
да гэтай школы ляжыць па вуліцы Хлуса. А на ёй у некаторых месцах адсутнічаюць
ходнікі, а там дзе ад іх нешта засталося, яны маюць не самы бяспечны стан. На
скрыжаваннях з іншымі вуліцамі, няма належнага агляду, і пры гэтым адсутнічае
дарожная разметка («зебры») і нават адпаведных знакаў няма. Некаторыя ўчасткі не маюць дастатковага
асвятлення ў цёмны час.
Таму ініцыятары петыцыі патрабуюць ад Рэчыцкага
райвыканкама і Упраўлення ўнутраных справаў Гомельскага аблвыканкама
абсталяваць на вуліцы ходнікі, пешаходныя пераходы, забяспечыць асвятленне на
ўсім працягу вуліцы і на скрыжаванні яе ў вуліцай Будаўнікоў абсталяваць «ляжачага
паліцэйскага».
Падпісаць петыцыю магчыма ТУТ.