Ужо ў трэці раз невядомыя імкнуцца сапсаваць мурал, дзе на бел-чырвона-белым фоне намаляваны вершнік з мячом. Раней з гаспадарамі падворку, у якім размешчаны мурал, спрабавалі змагацца нават міліцыянты на ўзроўні намесніка начальніка мясцовага РАУС.
Мурал у адным з прыватных двароў на вуліцы Геолагаў у Калінкавічах з’явіўся 7 лістапада. Паўз гэты дом праходзіць маршрут гарадскіх аўтобусаў і пліта плоту з муралам вельмі добра бачная з вуліцы. Ужо пасля абеду 8 лістапада, пакуль гаспадары былі на іншай кватэры, яго нехта зафарбаў брудна-чырвоным сурыкам. Але ўвечары таго ж дня актывісты адмылі мурал.
Раніцай 9 лістапада да двара прыехалі людзі ў рабочым адзенні прадпрыемства «Камунальнік калінкавіцкі» з вёдрамі з такой самай брудна-чырвонай фарбай. Але на той момант гаспадары былі дома і ў двор няпрошаных гасцей не пусцілі. Тады да двара пад’ехалі міліцыянты. Спачатку шэраговыя супрацоўнікі, а потым на падмогу ім прыбыў намеснік начальніка, начальнік міліцыі грамадскай бяспекі Калінкавіцкага РАУС падпалкоўнік Дзмітрый Воляк. Міліцыянты шукалі падставы незаконнасці валодання гаспадарамі жылым памяшканнем і прылеглай тэрыторыяй. Але не знайшлі.
Яшчэ праз некалькі дзён невядомыя кінулі ў мурал бутэльку з чорнай фарбай. Яна пабілася аб пліту па правы бок ад выявы вершніка, істотна не сапсаваўшы змест муралу.
Раніцай 29 снежня гаспадар кватэры, пад’язджаючы , пабачыў, што ад двара ад’ехала тая самая машына, якая ў лістападзе прывозіла людзей у адзенні камунальнага прадпрыемства з вёдрамі фарбы. Увайшоўшы ў двор, ён убачыў, што выява вершніка на мурале запэцканая карычневай фарбай (такі колер утвараецца пры змешванні чырвонай і зялёнай фарбаў). Гэтым разам ванадлы выкарысталі алейную фарбу і адмыць яе аказалася цяжэй. Але пазбавіць вершніка карычневага налёту калінкавіцкая актывісты, усё ж, здолелі.
