>
Праваабаронцам
дакладна вядома пра чацвярых затрыманых у Рэчыцы блізкіх сяброў Дзмітрыя
Усхопава.
Сёння ў Рэчыцы мае адбыцца пахаванне Дзмітрыя Усхопава, які загінуў пасля таго, як быў
затрыманы міліцыяй у навагоднюю ноч. На дадзены момант пацверджана інфармацыя
пра затрыманне самых блізкіх сяброў Дзмітрыя, якія меліся прыйсці на пахаванне.
Гэта Аляксей і Ганна Давыдковы, Аляксандр Снабкоў ды Ілля Бракарэнка.
Іх чакалі на пахаванні, у тым ліку для дапамогі. Але яны
зраніцы не выйшлі на сувязь. Пазней іхнія родзічы паведамілі, што іх затрымалі.
Таксама цяпер адсутнічае сувязь яшчэ з некалькімі блізкімі сябрамі з кола зносінаў
Дзмітрыя Усхопава. Але іх затрыманне пакуль няма каму пацвердзіць ці абвергнуць.
Інфармацыя пра іхні лёс высвятляецца.
Сваякі Дзмітрыя Усхопава ўпэўненыя, што яго да смерці
збілі ў РАУСе, спрабавалі там рэанімаваць, а, калі гэта не атрымалася, павезлі
ў лякарню, дзе а 1.20 ночы 1 студзеня дактары канстатавалі смерць. Родзічы
Дзмітрыя сцвярджаюць, што, калі яны 1 студзеня першы раз прыйшлі ў прыёмны
пакой лякарні, дактары казалі, што Дзмітрыя ім прывезлі ўжо ў стане комы, усяго
мокрага.
Паводле версіі, якую распаўсюджваюць карныя органы –
Следчы камітэт і МУС, Дзмітрыя ў стане алкагольнага ап’янення затрымалі
супрацоўнікі патрульна-паставой службы на аўтобусным прыпынку на цантральнай
вуліцы Рэчыцы. Ён аказаў супраціў, таму для затрымання выклікаўся аўтапатруль.
Пасля ў межах адміністрацыйнага працэсу яго павезлі на агляд у лякарню, але
дарогаю яму зрабілася блага і яго завезлі ў прыёмны пакой лякарні, дзе пачалі
праводзіць рэанімацыйныя мерапрыемствы. Паводле агучаных дадзеных, экспертыза дзяржаўнага
камітэту судовых экспертыз паказала, што ўтрыманне алкаголя ў крыві Усхопава
склала 4,3 праміле, пры ім быў знойдзены пакунак з марыхуанай, марыхуана
таксама выяўленая ў мачы Дзмітрыя. Раней праўладныя тэлеграм-каналы
паведамлялі, што ў Дзмітрыя знойдзена рэчыва амфітамінавай групы і ён нібыта
ліставаўся з крамай продажу наркотыкаў і ездзіў па закладку ў Гомель. Сваякі
сумняваюцца ў сапраўднасці скрын-шотаў, выкладзеных у прапагандысцкіх каналах,
бо напісаныя яны зусім не так, як звычайна перапісваўся ў інтэрнэце Дзмітрый
Усхопаў.
