>>
22 верасня так званы суд Рэчыцкага раёну прызнаў маладзёна вінаватым ва ўсіх трох «злачынствах», у якіх яго абвінавачвала пракуратура.
Канстанцін МІХАЛЬЦОЎ у судзе.
23-гадовага Канстанціна
Міхальцова пачалі
судзіць яшчэ 19 жніўня за падзеі вечара 9 жніўня мінулага году. Судовую
тройку ўзначальвала Марына Кацуба,
якую Лукашэнка прызначыў быў суддзёй. Яна правяла некалькі паседжанняў,
разглядаючы вінаватасць маладзёна.
У віну Міхальцову ставілася тое, што ён пасля галасавання
на выбарах прэзідэнта 9 жніўня 2020 года выйшаў на плошчу ў Рэчыцы, а калі там
пачалі без віны затрымліваць іншага хлопца, разам з групай людзей замінаў
карнікам гэта рабіць. У прыватнасці, ён нібыта выходзіў на праезную частку
вуліцы Чапаева і нібыта замінаў руху транспарту. Акрамя таго, яго вінавацілі ў
гвалце дачытчна міліцыянта з Рэчыцкага РАУС Дзмітрыя Гарая, які непасрэдна ўдзельнічаў у захопе невінаватага
хлопца. Сам Гарай распавядаў на судзе, што хлопца, які стаяў на плошчы,
вырашылі затрымаць толькі з тае прычыны, што ў яго на плячах быў беларускі
нацыянальны сцяг, і побач з ім знаходзілася група людзей. Людзі спрабавалі
перашкодзіць адвольнаму затрыманню. Сярод тых, хто спрабаваў не даць затрымаць
невінаватага апынуўся і Канстанцін Міхальцоў.
Калі затрыманага маладзёна карнікі пачалі садзіць у сваю
машыну, Міхальцоў штурхнуў Гарая ў спіну. Як казаў на першым судовым паседжанні
сам Гарай, ён адчуў «уздзеянне» і выказаў
здагадку, што «напэўна, боль мінімальны нейкі быў».
Тым не менш, супрацоўнік карнай структуры запытаў, каб суд прысудзіў яму
кампенсацыю маральнай шкоды ў памеры 2 000 рублёў.
Таксама Міхальцова абвінавацілі ў абразе Лукашэнкі. Яна нібыта
ўтрымлівалася ў меркаванні, якое Міхальцоў выказаў у тэлеграм-канале Вольнае
панства. Так званыя эксперты, што рабілі лінгвістычную экспертызу, выдалі
заключэнне, што допіс Міхальцова – гэта «паведамленне абразлівага характару,
якое ўтрымлівае негатыўную ацэнку прэзідэнта Лукашэнкі».
Абвяшчэнне выраку ў справе Канстаціна Міхальцова адбылося 22 верасня. Марына
Кацуба пастанавіла прызнаць Міхальцова вінаватым у «злачынствах»,
прадугледжаных часткай 1 артыкула 342 (удзел у групавых дзеяннях, якія груба
парушаюць грамадскі парадак і спалучаныя з непадпарадкаваннем патрабаванням
прадстаўнікоў улады), артыкулам 364 (гвалт у дачыненні да супрацоўніка органаў
унутраных справаў) і часткай 1 артыкула 368 (абраза прэзідэнта) Крымінальнага
кодэкса, які падпісаны Лукашэнкам і цяпер дзейнічае ў нашай краіне. Паводле
першага абвінавачвання яна пастанавіла зняволіць Міхальцова на 1,5 года,
паводле артыкула 364 – 2 гады калоніі, за негатыўную ацэнку Лукашэнкі – 1 год у
вязніцы. Марына Кацуба пастанавіла скласці вынесеныя тэрміны часткова і ў выніку вырашыла
прысудзіць Канстаніца Міхальцова да 3 гадоў пазбаўлення волі з адбыццём
пакарання ў калоніі агульнага рэжыму.
