>
Карнікі схапілі
рэчыцкага студэнта Кастуся Тэнца, які навучаецца ў Беларускім дзяржаўным
універсітэце транспарту ў Гомелі. Пра гэта праваабаронцам паведамілі
аднакурснікі Кастуся.
Затрыманне, імаверна, адбылося 8 снежня. Прычыны яго на гэты час невядомыя. Пры гэтым
ужо пасля ягонага затрымання нехта заходзіў на ягоную старонку ў сацыяльнай
сетцы ВКонтакте.
Кастусь Тэнц родам з
Рэчыцы. Яшчэ ў дзяцінстве быў вядомы там сваімі перамогамі ў розных відах
спорту. У 2019 годзе зацікавіўся беларускай мовай. Наведваў курсы Мова Нанова ў
Рэчыцы. Перайшоў сам на беларускую мову. Пасля паступіў у БелДУТ.
Як распавялі аднакурснікі Кастуся, ён часта ва ўніверсітэце ладзіў розныя акцыі для прапаганды беларускай мовы – віктарыны, дыскатэкі з беларускамоўнымі песнямі, экскурсіі ў адметныя беларускія месцы і ў родныя мясціны выбітных беларускіх дзеячоў.
Кастусь ТЭНЦ. Фота: сацсеткі.
У верасні, паводле аповеду аднакурснікаў, Кастусь
арганізаваў ва ўніверсітэце Тыдзень беларускай мовы. Тады на вялікім экране на
ўваходзе ў корпус дэманстравалася афіша, што праходзіць гэты тыдзень, а ўсіх
студэнтаў у холе сустракаў Кастусь з заданнямі з беларускай прафесійнай
лексікай кожнага факультэта. Пры гэтым, усе мэрапрыемствы ўзгадняліся ажно з
двума прарэктарамі – у выхаваўчай працы і ў бяспецы. Апошні – прадстаўнік КГБ,
які кантралюе палітычную арыентацыю студэнтаў і выкладчыкаў.
