>
Стаў вядомы прысуд жыхару Мазыра Вадзіму Баранаву,
якога абвінавацілі ў садзейнічанні экстрэмісцкай дзейнасці за тое, што ён зняў
відэа расейскай вайсковай тэхнікі падчас нападу Расеі на Украіну з боку
Беларусі і хацеў пераслаць некаторым «Тэлеграм»-каналам.
Справу мазыраніна разглядаў суддзя Гомельскага
абласнога суду Руслан Царук. У віну Вадзіму ставілі садзейнічанне
экстрэмісцкай дзейнасці паводле ч. 1 і ч. 2 арт. 361-4 Крымінальнага кодэкса.
Малады чалавек знаходзіўся ў Польшы, і прыехаў дадому да
маці. У доме раніцой 8 ліпеня яго затрымалі людзі
з ГУБАЗіКА. Прычынай стала тое, што ён нібыта ў 2020 г. хадзіў на мітынгі, а ў
2022 фатаграфаваў ваенную тэхніку і здымкі дасылаў у «Тэлеграм»-каналы.
Крыніца інфармацыі сцвярджае, што пры затрыманні
грамадзяніна збілі і пашкодзілі яго дакументы – пашпарт, працоўную кніжку і
вадзіцельскае пасведчанне (што перашкодзіла вяртанню за мяжу). Пракуратура і
Следчы камітэт на яго скаргу адказалі, што, маўляў, дакументы ён сам недзе страціў,
і безпадстаўна скардзіцца.
Пасля аднаўлення дакументаў, у дзень, калі атрымаў новую польскую візу, грамадзянін пайшоў у РАУС, каб спытаць пра свой выняты міліцыяй айфон. Там яго зноў затрымалі і склалі 6 пратаколаў аб адміністрацыйных правапарушэннях. Паводле першага прытаколу ён быў арыштаваны судом Мазырскага раёна на 6 сутак, паводле другога – аштрафаваны на 20 базавых велічыняў і г. д. – суддзя Элеанора Ярмоленка забірала пратаколы да таго часу, калі супраць грамадзяніна завялі крымінальную справу.
Паводле версіі абвінавачання, Вадзім Баранаў «меў
намер на садзейнічанне экстрэмісцкай дзейнасці і 26.02.2022 г здымаў на відэа
перамяшчэнне ваенізаваных падраздзяленняў неўстаноўленай дзяржавы для перадачы
дадзеных у «Тэлеграм»-каналы, прызнаныя экстрэмісцкімі, чым аказаў
садзейнічанне экстрэмісцкай дзейнасці, тым самым здзейсніў злачынства па ч. 1,
арт.361-4, а таксама неаднаразова перадаваў звесткі аб перамяшчэнні ваеннай
тэхнікі ў красавіку 2022 г., тым самым здзейсніў злачынства, прадугледжанае ч.
2 арт.361-4».
У судовым працэсе абвінавачаны прызнаў віну і патлумачыў,
што зняў відэа з вакна ўласнага дому і сапраўды пераслаў яго ў паблік. Пра тое,
што паблік прызнаны «экстрэмісцкім» Вадзім не ведаў. Мужчына таксама
патлумачыў, што проста хацеў «паказаць людзям, колькі ў нас з'явілася вайсковай
тэхнікі». Таксама Вадзім адзначыў, што калі б ведаў, што здымка
тэхнікі зʼяўляецца злачынствам – то ніколі гэтага не рабіў бы.
Суддзя Царук 12 студзеня пастанавіў
пакараць Вадзіма Баранава пазбаўленнем волі ў калоніі ва ўмовах
узмоцненага рэжыму тэрмінам на тры гады, а тэлефон, з дапамогай якога
«ажыццяўлялася злачынства» канфіскаваць, піша "Гомельская
Вясна".
