>
Справаздача называецца «ГУБАЗіК – карнае падраздзяленне рэжыму ў барацьбе з іншадумствам».
На 44 старонках сабраныя сведчанні грамадзян, якія пацярпелі ад катаванняў і жорсткага абыходжання ў
сувязі з палітычнымі перакананнямі, і апісаны дзеянні гэтай арганізацыі
(Галоўнае ўпраўленне па барацьбе з арганізаванай злачыннасцю і карупцыяй МУС
РБ): палітычны сыск, затрыманні і выкраданні іншадумцаў, фальсіфікацыя
крымінальных спраў, прымус да «пакаяння», пагромы пры вобысках і інш.
Міжнародны камітэт па расследаванні катаванняў
у Беларусі (МКРКБ) зрабіў выснову аб тым, што катаванні, акты жорсткасці і
іншыя дзеянні, якія здзяйсняюцца людзьмі з ГУБАЗіКа ў сувязі з палітычнымі
перакананнямі грамадзян, ахопліваюцца складам злачынства, прадугледжанага
артыкулам 128 Крымінальнага кодэкса РБ (злачынствы супраць бяспекі чалавецтва).
Паводле артыкула 85 КК РБ, асобы, вінаватыя ў здзяйсненні гэтага злачынства,
вызваленню ад крымінальнай адказнасці альбо пакарання ў сувязі з заканчэннем
тэрмінаў даўніны не падлягаюць.
У справаздачы таксама адзначана, што ў адпаведнасці з
нормамі міжнароднага крымінальнага права і часткай 3 артыкула 6 КК РБ
крымінальная адказнасць паводле артыкула 128 КК РБ прымяняецца незалежна ад
крымінальнага права, якое дзейнічала па месцы здзяйснення дзеяння. Гэта
азначае, што асобы, якія здзейснілі злачынствы супраць бяспекі чалавецтва ў РБ,
могуць быць прыцягнуты да адказнасці не толькі ў РБ, але і ў іншай краіне
(прынцып універсальнай юрысдыкцыі).
