>>
24 лютага МУС Беларусі чарговы раз абнавіла «Пералік грамадзян
Беларусі, замежных грамадзян або асоб без грамадзянства, якія маюць дачыненне
да экстрэмісцкай дзейнасці».
Акрамя іншых, у спіс дадалі палітзняволеную з Хойнік
Ірыну Абдукерыну, жыхара Рэчыцы Дзяніса Пырха і мазыранку Вольгу Шэўчык.
Ірына Абдукерына — былая настаўніца з Хойнікаў, якую затрымалі раніцай 5 красавіка 2022 г.
на лецішчы. Падставай для затрымання стала нібыта тое, што Абдукерына запісала
на тэлефон перамяшчэнне калоны расейскай вайсковай тэхнікі і пераслала запіс у
тэлеграм-канал "Беларускі Гаюн". Пра гэта гаворыцца ў
"пакаяльным відэа" з ёй.
Жанчыне прад'явілі абвінавачванне паводле наступных
артыкулаў Крымінальнага кодэкса: ч. 1 арт. 130 (распальванне
варожасці і варажнечы), 361-1 (удзел у экстрэмісцкім фарміраванні), 361-2 (фінансаванне
экстрэмісцкай дзейнасці), 369-1 (дыскрэдытацыя Беларусі).
6 снежня суддзя Руслан Царук прызнаў Ірыну
вінаватай і пакараў пазбаўленнем волі ў калоніі агульнага рэжыму тэрмінам
на чатыры гады. Таксама ёй прызначаны штраф у памеры 100 базавых велічынь.
25-гадовы жыхар
Рэчыцы Дзяніс Пырх у жніўні, кастрычніку і лістападзе 2020
г. адмоўна выказваўся у сацсетцы «У Кантакце» пра Лукашэнку.
У верасні 2021 г. Дзяніс Пырх у той жа сацсетцы
напісаў адмоўныя каментарыі пра намесніка дзяржаўнага сакратара Савета Бяспекі
РБ і начальніка ўпраўлення Следчага камітэта РБ па г. Мінску. Таксама негатыўна
выказаўся пра супрацоўнікаў КДБ пасля гібелі ў перастрэлцы жыхара Мінска і
супрацоўніка КДБ 28 верасня 2021 г.
За гэта ён прызнаны вінаватым «у публічнай абразе
прэзідэнта, абразе прадстаўніка ўлады ў сувязі з выкананнем ім службовых
абавязкаў, здзейсненым у інтэрнэце, а таксама ў распаўсюджванні заведама
ілжывых звестак аб прававым становішчы грамадзян у Беларусі і дзейнасці
дзяржаўных органаў, якія дыскрэдытуюць Рэспубліку Беларусь».
Суддзя Рэчыцкага суда Марына Кацуба 28 лістапада вынесла прысуд: паводле трох артыкулаў Крымінальнага кодэкса: частка 1 артыкула 368 «Абраза Прэзідэнта Рэспублікі Беларусь», артыкулы 369 «Абраза прадстаўніка ўлады» і 369-1 «Дыскрэдытацыя Рэспублікі Беларусь». Жыхар Рэчыцы прыгавораны да 2,5 гадоў пазбаўлення волі ў калоніі агульнага рэжыму і штрафу 4800 руб.
Вольга Шэўчык з Мазыра была затрымана 6 сакавіка 2022 года за шэраг каментароў, пакінутых ёй
у інтэрнэце, і за ўдзел у пратэстах.
Жанчына мае дваіх непаўнагадовых дзяцей.
Вядома, што яе вінавацяць паводле арт. 130
Крымінальнага кодэкса (Распальванне сацыяльнай варожасці і
варажнечы), арт. 342 Крымінальнага кодэксу (Актыўны ўдзел у групавых
дзеяннях, якія груба парушаюць грамадскі парадак), арт. 369 КК (Абраза
прадстаўніка ўлады), арт. 389 КК (Пагроза ў дачыненні да суддзі), арт.
391 КК (Абраза суддзі).
Разгляд справы Вольгі пачаўся 24 лістапада 2022 г. у Гомельскім абласным судзе. Пасяджэнні адбываліся ў закрытым рэжыме. Вядома, што суддзя Мікалай Доля прызначыў жанчыне зняволенне, тэрмін якога высвятляюць праваабаронцы.
У «Спіс экстрэмістаў» дадалі яшчэ 45 чалавек — цяпер у ім 2487 чалавек.
