>
У жніўні ў папраўчай установе адкрытага тыпу № 21 у Мазыры
пачаў адбываць пакаранне Віталь Прадыбайлаў, якога праваабаронцы прызналі
палітычным зняволеным.
35-гадовы грамадзянін асуджаны на 1,5 гады абмежавання волі
з накіраваннем у папраўчую ўстанову адкрытага тыпу (ПУАТ). Прыгавор вынесены
паводле артыкула 369 Крымінальнага кодэкса – «абраза прадстаўніка ўлады».
Камітэт па правах чалавека ААН яшчэ 12 чэрвеня 2011 г. ў
заяве № 34 зрабіў выснову аб тым, што крымінальная адказнасць за абразу
прадстаўнікоў улады павінна быць заменена на грамадзянска-прававыя меры
адказнасці, калі абраза не падбухторвала да гвалтоўных дзеянняў. ААН і АБСЕ
рэкамендавалі скасаваць крымінальную адказнасць за гэта.
Для адбыцця пакарання В. Прадыбайлаву было прадпісана
прыбыць у ПУАТ № 21 у Мазыры. Тэрмін абмежавання волі пачаўся 4 жніўня. У
сумеснай заяве, прынятай 12 жніўня, беларускія праваабаронцы ўключылі Віталя ў
спіс з 17 чалавек, якія ў гэты дзень былі прызнаны палітычнымі зняволенымі.
У цяперашні час у мазырскай ПУАТ адбываюць пакаранні 18 палітзняволеных.
В. Прадыбайлаву і ўсім ім можна дасылаць паштоўкі і лісты на адрас: ПУАТ № 21, бульвар
Юнацтва, 24, г. Мазыр, Гомельская вобл., 247783.
Агульная колькасць палітзняволеных у Беларусі на сённяшні дзень – 1309.
На здымку: Віталь Прадыбайлаў.
