>>
“З 13 на 14 кастрычніка ў рабочым пасёлку Сасновы Бор было
надзвычай напружана. Там было і міліцыянтаў, і супрацоўнікаў КДБ. Хапун …”,
- паведаміла “Гомельскай вясне” крыніца пра незвычайную актыўнасць супрацоўнікаў праваахоўных органаў.
Як аказалася, дзя гэтага знайшлася нагода.
У самым цэнтры пасёлка на мясцовай плошчы, што месціцца
паміж агульнаадукацыйнай школай, домам культуры і пасялковым саветам, устанавілі
флагшток, на якім вісеў дзяржаўны сцяг.
У ноч з 13 на 14 кастрычніка нехта перарэзаў дрот
флагштока, зняў сцяг Рэспублікі Беларусь і выкінуў у сметніцу, а замест яго
прымацаваў сцяг Украіны.
Вядома, што супраць асобаў, якія здзейснілі гэты акт, ужо
ўзбуджана крымінальная справа па арт. 370 (здзек з дзяржаўных сімвалаў)
Крымінальнага кодэкса.
На месца здарэння былі выкліканы супрацоўнікі
следча-аператыўнай групы. Падчас правядзення следчых і аператыўна-вышуковых
мерапрыемстваў была ўстаноўлена асоба, якая ўчыніла гэтае злачынства.
Ім аказаўся 41-гадовы грамадзянін В. С., які раней
працаваў у Светлагорскім раённым аддзеле па надзвычайных сітуацыях. Таксама
вядома, што праз пэўны час В. звольніўся. Быў законапаслухмяным
грамадзянінам.
У кватэры па месцы жыхарства В. С. і яго брата І. С. быў
праведзены вобшук. У адным з пакояў на сцяне вісеў бела-чырвона-белы сцяг з
выявай «Пагоні».
Цяпер мужчыны затрыманыя. Вядома, што І. С. атрымаў 7 сутак
адміністрацыйнага арышту, але невядома па якім артыкуле КоАП РБ і
вырашаецца пытанне аб прымяненні меры стрымання ў адносінах да В. С.
