>
Служба бяспекі Украіны (СБУ) паведаміла,
што ў Ровенскай вобласці ў ходзе шматэтапнай спецаперацыі затрыманы баевік з
расійскай ПВК “Вагнер”, якога расійская выведка накіравала ва Украіну для
дыверсій. Затрыманы – грамадзянін Беларусі.
Паведамляецца, што ён атрымаў заданне прыбыць з Беларусі ў
Ровенскую вобласць, якая мяжуе з Брэсцкай і Гомельскай абласцямі Беларусі, для
карэкціроўкі расійскіх удараў па энергетычнай інфраструктуры. У выніку павінна
была адключыцца падача электраэнергіі ў Кіеў і кіеўскую гарадскую агламерацыю.
Аб гэтых планах СБУ стала вядома яшчэ падчас знаходжання
“вагнераўца” ў Беларусі. З таго часу ўкраінскія спецслужбы паэтапна дакументавалі
яго дзеянні ад перасячэння дзяржаўнай мяжы да прыбыцця на месца дыверсіі. У
выніку грамадзянін Беларусі быў затрыманы пры спробе прымацаваць некалькі
GPS-трэкераў да слупоў ліній электраперадач.
Па сігналах «маякоў» расійскія войскі збіраліся нанесці ўдар
па энергетычных аб'ектах, у тым ліку з выкарыстаннем беспілотных паветраных
апаратаў тыпу “Шахед”.
Паводле паведамлення СБУ, затрыманы з'яўляецца грамадзянінам
Беларусі, які ўваходзіць у агентурны апарат расійскага Галоўнага разведвальнага
ўпраўлення. З 2014 па 2017 г. ён уваходзіў у склад групоўкі “ЛДНР” і браў удзел
у баявых дзеяннях супраць сіл антытэрарыстычнай аперацыі на ўсходзе Украіны. У
пачатку ўварвання Расійскай Федэрацыі ва Украіну ў 2022 г. ён далучыўся да расійскай
прыватнай ваеннай кампаніі “Вагнер”, у складзе якой удзельнічаў у нападзе на г.
Бахмут Данецкай вобласці і суседнія населеныя пункты.
Пазней ён вярнуўся ў Беларусь, дзе атрымаў заданне ад
куратара з ваеннай разведкі РФ аб падрыхтоўцы дыверсій на памежнай тэрыторыі Украіны.
Следчыя плануюць паведаміць затрыманаму аб падазрэнні па двух артыкулах Крымінальнага кодэкса Украіны: артыкул 113 (дыверсія) і частка 1 артыкула 258-3 (удзел у тэрарыстычнай групоўцы або тэрарыстычнай арганізацыі). Паведамляецца, што спецаперацыю правяло Упраўленне СБУ ў Ровенскай вобласці сумесна з Дзяржаўнай памежнай службай Украіны пад працэсуальным кіраўніцтвам Ровенскай абласной пракуратуры.
На здымку: падчас затрымання.
