>
З пачатку ўварвання Расіі ва Украіну ў Беларусь былі
вывезены як мінімум 2442 дзіцяці з Украіны. Пра гэта гаворыцца ў справаздачы,
апублікаванай праграмай "Конфлікт
абзаваторэй", якую падтрымлівае Дзяржаўны дэпартамэнт ЗША.
Справаздача "Беларусь
супрацоўнічае з Расіяй у сістэматычным вывазе украінскіх дзяцей" апублікавана
16 лістапада праграмай "Conflict Observatory, "Абсерваторыя канфлікту"). У ёй апісваецца "ўдзел
Беларусі ў сістэматычным вывазе Расіяй дзяцей з Украіны ва ўмовах незаконнай і
несправакаванай вайны".
У аснову справаздачы
пакладзены высновы Лабараторыі гуманітарных даследаванняў Йельскай школы
грамадскага здароўя (Yale School of Public Health) – аддзялення Ельскага
ўніверсітэта (г. Нью-Хэйвэн, штат Канектыкут). Лабараторыя, якая з'яўляецца
партнёрам праграмы "Конфлікт абзаваторэй", вызначыла, што з пачатку ўварвання
Расіі ва Украіну ў Беларусь былі вывезены не менш за 2442 дзіцяці з Украіны.
«Гэтыя дзеці ва ўзросьце ад
6 да 17 гадоў былі перавезеныя з акупаваных Расіяй рэгіёнаў Украіны ў «Дубраву»
(дзіцячы летнік ААТ «Беларуськалій» у
Салігорскім раёне Мінскай вобласці – рэд.) і яшчэ 12 устаноў Беларусі, дзе
многія з іх праходзяць палітычнае і культурнае перавыхаванне і вайсковую
падрыхтоўку на карысць Беларусі і Расіі» – гаворыцца ў справаздачы.
Паводле дакумента,
«перадача дзяцей з акупаванай тэрыторыі Украіны ў Беларусь каардынуецца прэзідэнтам
Расіі Уладзімірам Пуціным і беларускім аўтарытарным правіцелем Аляксандрам
Лукашэнкам праз Саюзную дзяржаву – наддзяржаўнае ўтварэньне Расіі і Беларусі»,
пры ўдзеле беларускіх і расійскіх спецслужб.
У дакуменце робіцца
выснова, што службовыя асобы, якія ўдзельнічаюць у вывазе ўкраінскіх дзяцей,
адбіраюць іх з уразлівых груп насельніцтва, у тым ліку дзяцей-інвалідаў, дзяцей
з малазабяспечаных сем'яў, дзяцей бацькоў-вайскоўцаў і меркаваных сірот. Гэтыя
дзеці перавозяцца ў Беларусь ці Расію, магчыма, без згоды сем'яў і без дакладнага
шляху вяртання дадому. Аўтары справаздачы адзначаюць, што «з акупаванай Расіяй
тэрыторыі Украіны дзяцей перавозілі ў Растоў-на-Доне, а потым цягніком у
Беларусь».
«Следчы камітэт Расіі, міністэрства
адукацыі самаабвешчаных так званых ЛНР і ДНР, а таксама арганізацыі абедзвюх
краін, якія падтрымліваюць рэжым, садзейнічалі перамяшчэнню дзяцей з акупаванай
тэрыторыі Украіны ў Беларусь», – гаворыцца ў дакуменце.
Лабараторыя назвала праўладныя
беларускія і расійскія асобы і арганізацыі, якія спрыяюць перамяшчэнню дзяцей з
Украіны ў Беларусь і падвяргаюць іх перавыхаванню. Сярод іх «беларускі дзеяч
Аляксей Талай (глава фонда Аляксея Талая
– рэд.), беларускі дзяржаўны вытворца калійных угнаенняў ААТ
«Беларуськалій», Беларускі рэспубліканскі саюз моладзі і ультранацыяналістычныя
праўладныя расійскія мотаклубы».
У справаздачы
падкрэсліваецца, што «колькасць дзяцей, якія засталіся ў Беларусі, невядомая:
ключавыя фігуранты, якія ўдзельнічалі ў перавозцы дзяцей з акупаванай тэрыторыі
Украіны ў Беларусь, без доказаў сцвярджаюць, што ўсе дзеці былі вернуты ва
Украіну». Аднак лабараторыя не змагла знайсці паслядоўныя і пацвярджальныя
дадзеныя, каб спраўдзіць, што дзеці, названыя ў гэтай справаздачы, вярнуліся ва
Украіну з Беларусі.
Дзярждэпартамент ЗША
лічыць, што «выкрыцці датычнасці Беларусі паказваюць маштаб больш шырокай
кампаніі, якую вядзе Расія. Расійскія вайскоўцы і ўрад вывезлі ў Расею сотні тысяч
украінскіх мірных жыхароў, у тым ліку дзяцей, якія былі гвалтоўна разлучаныя са
сваімі сем'ямі».
«Злучаныя Штаты будуць
працягваць пераслед тых, хто мае дачыненне да парушэнняў, звязаных з вайной
Расіі супраць Украіны», – гаворыцца ў заяве Дзярждэпартамента.
На здымке: дзяцей з Украіны даставілі на базу Унутраных
войск Беларусі, дзе малалетняму дзіця паказваюць агнястрэльную зброю.
