>>
Суд Мазырскага раёна вынес суровы прысуд мясцоваму жыхару Уладзіміру Андрэйчуку, якога абвінавацілі ў гвалце альбо пагрозе прымянення гвалту ў дачыненні да супрацоўніка органаў унутраных спраў (арт. 364 КК) і арганізацыі і падрыхтоўцы дзеянняў, якія груба парушаюць грамадскі парадак, альбо актыўным ўдзеле у іх (ч. 1 арт. 342 КК).
Судовы працэс праходзіў у сакавіку пад старшынством суддзі Галіны Кніжонак.
Згодна з матэрыяламі справы Уладзімір Андрэйчук, увечары
11 жніўня 2020 года, "будучы дакладна дасведчаным з розных крыніц аб планаваным
правядзенні на тэрыторыі Мазыра на канчатковым этапе выбараў Прэзідэнта
Рэспублікі Беларусь дзейнічаючы наўмысна, груба парушаючы грамадскі парадак, аказваючы
відавочнае непадпарадкаванне патрабаванням супрацоўнікаў АУС і ваеннаслужачым,
разам з іншымі пратэстоўцамі перакрывалі дарожны рух, станавіліся ў счэпкі,
гучна крычалі, свісталі, выкрыквалі розныя лозунгі".
Пры гэтым кідалі камяні і бутэлькі ў бок супрацоўнікаў
міліцыі і службовага транспарту.
Тады на бульвары Юнацтва ў Мазыры было затрымана больш
дзесяці чалавек, якія «распылялі ў праваахоўнікаў газавыя балончыкі, кідалі ў
іх камяні».
“Калі нехта з натоўпу стаў кідаць камяні ў супрацоўнікаў міліцыі, я падтрымаў гэтую ідэю і таксама стаў кідаць камяні, кінуў не менш за 10 камянёў”, – прызнаўся ён у судзе.
У справе – 8
пацярпелых супрацоўнікаў міліцыі. Пашкоджанні атрымала службовая тэхніка:
аўтамабіль УАЗ і аўтобус ПАЗ.
Суд Мазырскага раёна 21 сакавіка прызначыў Андрэйчуку па
частцы 1 артыкула 342 Крымінальнага кодэкса – пазбаўленне волі на тэрмін адзін
год і шэсць месяцаў, а па артыкуле 364 – пазбаўленне волі на тэрмін тры гады.
Але за час ад жніўня 2020 года і да высвятлення ягонай
ролі ў масавых беспарадках, Андрэйчука паспелі асудзіць па некалькіх частках “наркатычнага”
328 артыкула да 13 год пазбаўлення волі.
Такім чынам, жыхару Мазыра канчаткова прызначылі пакаранне
ў выглядзе пазбаўлення волі на тэрмін 15 гадоў з адбываннем пакарання ў
папраўчай калоніі ў умовах узмоцненага рэжыму са штрафам у памеры 150 базавых
велічынь.
