>
Сітуацыя на мяжы Украіны з
Беларуссю цалкам кантраляваная, пасля ратацыі сваіх войск Расія не ўводзіла
новыя падраздзяленні на беларускую тэрыторыю. Пра гэта 31 кастрычніка заявіў
прэс-сакратар Дзяржаўнай памежнай службы Украіны Андрэй Дземчанка.
«Сітуацыя на мяжы з Рэспублікай Беларусь цалкам
кантраляваная. Мы не адзначаем перамяшчэння асабовага складу і тэхнікі паблізу
нашай мяжы. Усё (навучанне войск – рэд.) праходзіць на палігонах. Мы актыўна
адсочваем сітуацыю, аналізуем, наколькі яна можа ўяўляць пагрозу. Дадам, што
Расійская Федэрацыя ў рамках ратацыі вывела з тэрыторыі Беларусі ўсе свае
падраздзяленні і не ўводзіла новыя», – сказаў прэс-сакратар.
Па словах Андрэя
Дземчанкі, у Беларусі па-ранейшаму застаецца пэўная колькасць расейскіх
вайскоўцаў, але гэта ў асноўным абслуговы персанал тых расійскіх вайсковых
тэхнічных сродкаў, якія яшчэ засталіся ў Беларусі.
«Што тычыцца знаходжання расійскіх наймітаў, то гэта невялікая
лічба – па нашых дадзеных, менш за тысячу чалавек», – сказаў А. Дземчанка
(верагодна, гаворка ідзе пра наймітаў былой ПВК «Вагнер»).
Аб гэтым прадстаўнік украінскай памежнай службы заявіў у
эфіры тэлемарафона «Адзіныя навіны», паведаміла агенцтва «Укрінфарм». Нагадаем,
што на паўночнай мяжы Украіны павялічваюць шчыльнасць мінна-выбуховых
загараджэнняў.
На здымку: Андрэй Дземчанка.
