>
Колькасць
жанчын сярод палітзняволеных у Гомельскай вобласці зараз больш чым у два разы
перавышае колькасць палітзняволеных-мужчын і складае 67,9% ад агульнага ліку.
На цяперашні час у месцах зняволення
ў Гомельскай вобласці ўтрымліваецца 114 жанчын, якіх праваабаронцы прызналі
палітычнымі зняволенымі. Яны знаходзяцца за кратамі за ўдзел у пратэстных
акцыях альбо іншыя пратэстныя дзеянні. 107 з іх – у гомельскай жаночай папраўчай
калоніі № 4, 3 – у гомельскім СІЗА № 3, 3 – у жаночай калоніі № 24 ў г. п.
Зарэчча Рэчыцкага раёна, адна – у ізалятары часовага ўтрымання ў Рэчыцы.
Раней мужчыны значна
пераважалі сярод палітзняволеных у Гомельскай вобласці з-за іх вялікай
колькасці ў СІЗА-3. Яны былі затрыманы пасля пратэстных акцый, звязаных з
недаверам да абвешчаных вынікаў прэзідэнцкіх выбараў 2020 г. За апошнія месяцы
гэта сумная статыстыка змянілася. Пасля вынясення прыгавораў судамі
палітзняволеныя-мужчыны былі этапаваны ў месцы пазбаўлення волі ў асноўным у
іншыя вобласці. Палітзняволеныя-жанчыны пераводзіліся з іншых абласцей у
Гомельскую, паколькі тут існуюць дзве жаночыя калоніі.
Зараз у месцах пазбаўлення
волі ў Гомельскай вобласці налічваецца 54 палітзняволеных-мужчын: 16 – у СІЗА-3,
1 – у ізалятары часовага ўтрымання ў Гомелі, 5 – у калоніі № 20 у Мазырскім
раёне, 20 – у папраўчай установе адкрытага тыпу № 21 у Мазыры, 12 – у
аналагічнай установе ў Гомелі.
Хоць частка палітзняволеных
ужо выйшла на свабоду пасля заканчэння тэрміна пакарання, іх агульная колькасць
на Гомельшчыне за апошні год змянілася нязначна: у ліпені мінулага года – 171,
зараз – 168.
У цэлым у краіне на сённяшні
дзень налічваецца 1480 палітзняволеных, з іх 161 жанчына (10,9%).
