Калі ад тура да турмы – не адзін крок, але блізка. “Беларустурыст” прапануе з’ездзіць у Абхазію

Цімур Казачэнка 01.08.2022

>>

Кампанія “Беларустурыст” у Гомелі, Мазыры і іншых гарадах прапануе адправіцца ў паездку ў Абхазію. Кліентаў не інфармуюць аб тым, што такім чынам у далейшым жыцці з’яўляецца перспектыва апынуцца ў грузінскай турме.

Аб маршруце аўтобуснага тура патэнцыйным кліентам паведамляюць агульнымі словамі: “Гомель – Абхазія – Гомель”. Пры гэтым замоўчваецца той факт, што ўезд у Абхазію будзе ажыццяўляцца з Адлерскага раёну Краснадарскага краю Расіі.

Аднак справа ў тым, што наведванне самаабвешчанай Абхазскай Рэспублікі ў абыход грузінскага памежнага кантролю – гэта парушэнне дзяржаўнай мяжы Грузіі і крымінальнае злачынства паводле законаў Грузіі. Каб было больш зразумела, можна сказаць так: з пункту гледжання грузінскага заканадаўства, турысцкі аўтобус, які ўязджае ў Абхазію з Краснадарскага краю – гэта арганізаваная злачынная група.

У выпадку, калі чалавек такім спосабам наведаў Абхазію, а ў далейшым патрапіць у Грузію, яго затрымліваюць з узбуджэннем крымінальнай справы і змешчаюць у следчы ізалятар – у лепшым выпадку на доўгія месяцы да суда. І спасылкі на “Беларустурыст” у такім выпадку не дапамагаюць.

Большасць жыхароў Беларусі пра такія нюансы далёкіх краёў не ведае. Але дзіўна, калі аб гэтым не ведаюць у “Беларустурысце”. Альбо ведаюць? І фактычна падштурхоўваюць грамадзян да парушэння крымінальнага кодэкса іншай дзяржавы?

Патэнцыйных кліентаў толькі папярэджваюць, што ўсе разлікі ў Абхазіі робяцца ў расійскіх рублях, але плацёжныя карткі беларускіх банкаў там не дзейнічаюць, таму, маўляў, бярыце з сабой наяўныя расійскія грошы. Чаму не дзейнічаюць карткі – пра гэта таксама маўчаць. А прычына ў тым, што Абхазія, як непрызнаная «дзяржава», не падключана да электронных плацёжных сістэм.

Дарэчы, па той жа прычыне непрызнанасці ў Абхазію не лятае “Белавія”, хоць аэрапорт там ёсць. Расійскія авіякампаніі туды таксама не лятаюць, таму што ў такім выпадку яны падвергліся б санкцыям з боку міжнародных авіяцыйных арганізацый.

Гомельскае і Мазырскае бюро падарожжаў уваходзяць ва ўнітарнае прадпрыемства “Беларустурыст”, якое адносіцца да Федэрацыі прафсаюзаў Беларусі. Паездкі ў Абхазію прапануюць у “Беларустурысце” і ў іншых гарадах.

Абхазія – былая аўтаномная тэрыторыя Грузіі, якая ў 1994 г. аб’явіла сябе «самастойнай» пры падбухторванні з боку Расіі. Беларусь не прызнае аддзяленне Абхазіі ад Грузіі. Як «самастойную» дзяржаву Абхазію прызналі толькі Расія, Венесуэла, Науру, Нікарагуа і Сірыя. ААН лічыць Абхазію тэрыторыяй Грузіі.