>>
Праваабаронцам стала вядома, што з гомельскай калоніі № 4 на волю выйшла праваабаронца з Рэчыцы, валантэрка «Вясны» Таццяна Ласіца.
Таццяна ЛАСІЦА
Пасля выбараў 2020 года яна разам з іншымі мясцовымі
актывістамі дапамагала абараняць людзей у судах і сплочваць штрафы. Была
затрымана 21 студзеня 2021 года супрацоўнікамі МУС у аэрапорце Мінска пры
спробе вылецець у Вільню.
3 верасня 2021 года пачаўся суд над ёй і вядомым
гомельскім актывістам Леанідам
Судаленкам. Іх абвінавацілі ў арганізацыі і падрыхтоўцы дзеянняў, якія
груба парушаюць грамадскі парадак (ч. 1 арт. 342 КК) і навучанні і падрыхтоўцы
асоб для ўдзелу ў такіх дзеяннях, а таксама фінансаванні або іншым матэрыяльным
забеспячэнні (ч. 2 арт. 342 КК).
3 лістапада прызначаны Лукашэнкам на пасаду суддзі ў суд
Цэнтральнага раёна Гомеля Сяргей
Салоўскі, даўно вядомы сваім удзелам у палітычных рэпрэсіях, прызнаў
Таццяну вінаватай і прызначыў ёй пакаранне ў выглядзе двух з паловай гадоў
пазбаўлення волі з адбываннем пакарання ў папраўчай калоніі агульнага рэжыму.
Таццяна знаходзілася за кратамі 1 год і 8 месяцаў.
Таццяна Ласіца – вядомая ў Рэчыцы актывістка. Дзякуючы яе
намаганням, у горадзе з'явілася мемарыяльная дошка ў гонар ураджэнца Рэчыцы,
артыста Яфіма Капяляна, а ўлады горада ўнеслі
ў свае планы будаўніцтва школы ў адным з новых мікрараёнаў. У 2019 годзе
Таццяна Ласіца балатавалася кандыдыткай на дэпутата парламента.
