На 4 лістапада для разгляду ў Гомельскім абласным судзе прызначана 21 адміністрацыйная справа, на якія паступілі скаргі альбо пратэсты. З іх 11 (52%) – справы, паводле артыкула 23.34 Кодэкса аб адміністрацыйных правапарушэннях.
Артыкул 23.34 ў апошнія месяцы стаў ці не самым масавым,
паводле якога выносяць пакаранні ў судах Беларусі. Ён прадугледжвае адказнасць
за парушэнне парадку арганізацыі і правядзення масавага мерапрыемства. Пры першым
прыцягненні паводле гэтага артыкула можна патрапіць за краты на тэрмін да 15
сутак, альбо заплаціць дзяржапарату да 30 базавых велічыняў (810 рублёў)
штрафу. Калі ж паводле гэтага артыкула чалавека караюць паўторна цягам году,
дык акрамя 15-суткавага арышту, магчымы штраф ужо ад 20 базавых велічыняў (540
рублёў) да 50 базавых велічыняў (1350 рублёў).
Як бачым, суды заваленыя справамі паводле артыкулу 23.34.
Толькі за адзін дзень і толькі ад тых, хто абскарджвае рашэнні судоў першай
інстанцыі, абласны суд мусіць разгледзаць скаргі на пастановы паводле гэтага
артыкула судоў Мазырскага, Рэчыцкага, Гомельскага, Жлобінскага раёнаў, а
таксама Чыгуначнага, Савецкага і Цэнтральнага раёнаў Гомеля.
