На работніка Мазырскага НПЗ, які прысаромеў калег, склалі пратакол за ўдзел у несанкцыянаванай акцыі

Палеская Вясна 29.10.2020

29 кастрычніка аператар адной з установак Мазырскага нафтаперапрацоўчага заводу Вячаслаў Астанін выйшаў да прахадной заводу з плакатам «Не сорамна перад Азотам?»

Спачатку да яго падыйшоў ахоўнік прадпрыемства. Пазней прыехалі міліцыянты і забралі яго ў Мазырскі РАУС. Як паведаміў Палескай Вясне Вячаслаў, там яго пратрымалі 5 гадзін, апытвалі. Потым далі падпісаць нейкую паперу аб абавязанні з’явіцца ў РАУС а 18-й гадзіне.

Увечары Вячаслаў прыйшоў у РАУС з цёплымі рэчамі, ежай ды сродкамі гігіены, гатовы да таго, што яго затрымаюць. Але яму выдалі копію пратакола аб адміністрацыйным правапарушэнні паводле часткі 1 артыкула 23.34 за ўдзел у несанкцыянаваным масавым мерапрыемстве, а таксама ўзялі адбіткі пальцаў.

«З папярэдніх размоваў з калегамі, магу сцвярджаць, што на Мазырскім НПЗ мяне падтрымлівае большасць калектыву. На жаль, пакуль не многія гатовыя далучыцца да агульнанацыянальнага страйку праз вялікі ціск і запужванні з боку кіраўніцтва. Мне зараз звальненнем не пагражалі, але намякнулі, што могуць не працягнуць кантракт, які скончваецца ў мяне ў студзені», - падзяліўся Вячаслаў Астанін.     

22 чэрвеня на світанні…

Жорж Кунцэвіч 09.06.2022