У бюджэтных
установах Рэчыцы прафсаюзныя арганізацыі рассылаюць сваім супрацоўнікам
паведамленні аб тым, што неабходна дапамагчы аднавіцца старшыням і чальцам
выбарчых камісіяў «пасля складанай выбарчай кампаніі».
Чытачы Палескай Вясны даслалі ў рэдакцыю скрын-шот
паведамлення, якое рассылаецца у працоўным чаце адной з навучальных установаў
Рэчыцы, у якой у жніўні месціўся ўчастак па выбарах прэзідэнта і працавала
выбарчая камісія.
Як удакладніла крыніца, гэтыя паведамленні перасылаюцца зверху ад раённай арганізацыі прафсаюза работнікаў адукацыі і навукі. Ад яе, імаверна, такую інфармацыю запытвае афіцыйная федэрацыя прафсаюзаў і цэнтральны камітэт прафсаюза работнікаў адукацыі і навукі.
Работнікам прапануюць вызначыць спісы тых, хто мае
патрэбу ў аздараўленні. Пры гэтым асаблівы ўпор прапануецца зрабіць на тых, хто
перахварэў на каранавірус, альбо быў задзейнічаны ў выбарчых камісіях.
«Гэта ў большай ступені тычыцца
людзей, якія перахварэлі на каранавірус, альбо тых, каму трэба аднавіцца пасля
складанай выбарчай кампаніі (старшыні ўчастковых выбарчых камісіяў, чальцы
тэрытарыяльных і д.т.п.) Кошт пуцёвак будзе значна кампенсавацца», –
гаворыцца ў паведамленні.
У наступных паведамленнях удакладняецца, што для такога аздараўлення будзе
адмыслова прадстаўлены адпачынак і такую магчымасць абмяркоўвалі «на ўзроўні
намесніка міністра адукацыі». Таксама ўдакладняюць, што аздараўленне
прадастаўляюць і для чальцоў выбарчых камісіяў.
