>
З дапамогай артыкула
23.34 Адміністрацыйнага кодэкса міліцыя ў Светлагорску лічыць магчымым
рэгуляваць пытанні выбарчага заканадаўства і, у прыватнасці, перашкаджаць збору
подпісаў за адкліканне дэпутата Палаты прадстаўнікоў.
Светлагорскія міліцыянты падыйшлі да групы гараджан, якія 29 жніўня сядзелі
за столікам кавярні на вуліцы горада і прапаноўвалі ахвочым пакінуць подпіс,
каб ініцыяваць сход выбаршчыкаў за адклікане дэпутата. Супрацоўнікі карнага
органа пачалі папярэджваць збіральнікаў подпісаў, што яны праводзяць «мерапрыемства»,
якое «з’яўляецца несанкцыянаваным».
Збіральнікі подпісаў запыталіся ў міліцыянтаў ці ёсць закон, на падставе якога ім забаронена збіраць попісы ў грамадскіх месцах. На гэта міліцыянт паведаміў, што ў дачыненні да грамадзян, якія збіраюць подпісы, пачаты адміністрацыйны працэс, у межах якога ім усё патлумачана – «дадзеныя дзеянні вашыя несанкцыянаваныя». Збіральнікі подпісаў за адкліканне дэпутата ўдакладнілі якім артыкулам закона гэта забаронена.
Адказ міліцыянта быў, відаць, вышынёй юрыдычных пазнанняў маёра міліцыі: «Паводле артыкула 23.34». Далей ён
удакладніў, што знаходжанне людзей за столікам вулічнай кавярні і пры гэтым збор
подпісаў за адкліканне дэпутата з’яўлаецца незаконным пікетаваннем.
Паводле дзеючага цяпер у Беларусі закона «Аб масавых мерапрыемствах», пікетаванне - публічнае выказванне
грамадзянінам ці групай грамадзян грамадска-палітычных, групавых, асабістых і
іншых інтарэсаў або пратэсту (без шэсця), у тым ліку шляхам галадоўкі, па
якіх-небудзь праблемах з выкарыстаннем ці без выкарыстання плакатаў, транспарантаў
i iншых сродкаў.
Цікава, ці хутка светлагорская міліцыя пачне распачынаць адміністрацыйныя
працэсы ў дачыненні да груп грамадзян, якія публічна стаяць на аўтобусных
прыпынках, выказваючы тым самым без выкарыстання плакатаў, транспарантаў і
іншых сродкаў групавы інтарэс у прыбыцці аўтобуса?
