>>
29 жніўня ў парку культуры і адпачынку ў Калінкавічах на танцпляцоўцы адбываўся праўладны канцэрт «Квітней, мой родны край!», на які настоліва рэкамендавалі прыйсці супрацоўнікам бюджэтных арганізацыяў. А побач на адной з алеяў парку двое мужчынаў гулялі ў шахматы. Побач з адным з іх быў дзяржаўны сцяг, побач з іншым – нацыянальны. Гэта не спадабалася мясцовай міліцыі.
Як удалося высветліць Палескай Вясне, таварыскую партыю ў шахматы вырашылі згуляць двое каленкаўцаў – Павел Тозік і Аляксандр Кучар. У шахматы яны вырашылі згуляць, як самы міралюбівы і інтэлектуальны від спорту, як сімвал міру ў беларускім грамадстве, і таму пад дзяржаўным чырвона-зялёным і нацыянальным – бел-чырвона-белым сцягамі. Апошні, як вядома, стаў сімвалам змагання народа Беларусі за дэмакратычныя змены.
Але, гульня мірнай не атрымалася. Супрацоўнікі Калінкавіцкага РАУС вырашылі, мабыць, што шахматная партыя пад сцягамі – гэта ўжо масавае мерапрыемства, якое нясе пагрозу нацыянальнай бяспецы, і прыбылі аж учацвярох, каб затрымаць двух шахматыстаў. А з лаўкі насупраць аперацыю кантраляваў яшчэ і пяты – начальнік Калінкавіцкага РАУС Дзяніс Кот. Праўда, ён у цывільным адзенні, бо справы адбываліся пасля заканэчння працоўнага дня. А можа, ён выконваў у парку аператыўныя мерапрыемствы, таму быў апрануты ў спартовы строй і цёмныя акуляры.
Начальнік Калінкавіцкага РАУС Дзяніс КОТ (на пярэднім плане).
Затрыманых разам са сцягамі даставілі ў Калінкавіцкі РАУС.
