1 жніўня ў Мазыры прайшоў пікет-сустрэча з даверанымі асобамі кандыдаткі на прэзідэнта Святланы Ціханоўскай, на якой, паводле ацэнак назіральнікаў, сабралася ад 600 да 1000 чалавек.
Ад каманды Ціханоўскай у Мазыр прыехалі яе давераныя асобы Валянцін Фралоў і Ева Сапрыгіна. Яны адкрылі пікет і практычна адразу запрасілі мазырчукоў падыходзіць да «адкрытага мікрафона» і выказвацца. Практычна ўвесь пікет прайшоў менавіта ў такім фармаце. І, тым не менш, трох гадзінаў, якія адвялі на імпрэзу мясцовыя ўлады, не хапіла, каб усе выказаліся.
Амаль у самым пачатку да мікрафона выйшла карэспандэнтка дзяржаўнай мазырскай раённай газеты «Жыццё Палесся» Наталля Канопліч, вядомая ў горадзе і краіне сваімі прапагандысцкімі матэрыяламі. Яе выступ абурыў тых, хто сабраўся на пікет. Таму ва многіх наступных выступах гучалі звароты да дзяржаўнай прапагандысткі.
Выступілі на пікеце і яшчэ некалькі прыхільнікаў дзеючай улады. Адзін з іх – Аляксандр Бобр, з’яўляецца назіральнікам пры Мазырскай раённай выбарчай камісіі, а іншы, загадчык Мазырскага філіялу Гомельскай вучэльні алімпійскага рэзерву Аляксандр Сяркоў – чалец Мазырскай раённай выбарчай камісіі.
Таксама пікет наведаў старшыня Мазырскай раённай выбарчай камісіі Міхаіл Пашынскі. Ён спраўдзіў дакументы ў Валянціна Фралова, арганізатара пікету і даверанай асобы Святланы Ціханоўскай.
На пікеце выступалі самыя розныя людзі, самых розных узростаў, прафесіяў, сацыяльнага стану, дабрабыту. Але ў большасці з іх думкі былі вельмі падобныя.
