Напярэдадні прыезду ў Рэчыцу самой кандыдаткі на прэзідэнта Святланы Ціханоўскай разам з кіраўнікамі штабоў іншых кандадатаў, якіх дзеючая ўлада не дапусціла да ўзелу ў выбарах – Веранікі Цапкалы і Марыі Калеснікавай, у горадзе прайшоў пікет з даверанымі асобамі Святланы Ціханоўскай.
На плошчы перад капліцай Еўфрасінні Полацкай у цэнтры Рэчыцы сабралася некалькі соцень чалавек. Паводле дадзеных назіральнікаў – больш за 200. Сайт райвыканкама гэтую сустрэчу не анансаваў.
У пікеце ўзялі ўдзел давераныя асобы Ціханоўскай – Юрый Уласаў і Таццяна Канеўская, а таксама вядомая гомельская актывістка, якой цэнтрвыбаркам не дазволіў самой збіраць подпісы за сваё вылучэнне, фельдшарка Алена Давыдава.
Давераныя асобы агучылі мэту ўдзелу ў выбарах Святланы Ціханоўскай – змяніць цяперашняга кіраўніка дзяржавы, каб правесці сумленныя выбары, у якіх маглі б удзельнічаць усе, хто лічыць сябе здольным зрабіць Беларусь лепей, а людзі мелі магчымасць рэальна выбраць.
Асноўная частка пікету праходзіла ў форме адкрытага мікрафона – ахвочыя людзі проста падыходзілі і выказвалі свае думкі. Сярод іх былі і маладыя, і сталыя. Прыехалі на рэчыцкі пікет і некалькі чалавек з суседняга Светлагорска.
Таксама да пікету ў падтрымку Святланы Ціханоўскай падыходзілі і некалькі чалавек, якія падтрымліваюць дзеючага прэзідэнта. Яны не наважыліся падыйсці да мікрафона і выступіць. Але спрабавалі паразмаўляць з даверанымі асобамі. Размову з адным з іх пераказаў у мікрафон Юрый Уласаў. Нейкі сталага веку мужчына сказаў яму, што за тое, што прыхільнікі Ціханоўскай «баламуцяць народ» іх усіх трэба расстрэльваць з кулямётаў.
Скончылася мерапрыемства сумесным выкананнем песні «Разбуры турмы муры» (у яе расійскай версіі), якая стала свайго роду гімнам кампаніі мірнай змены ўлады праз выбары ў нашай краіне.
26 ліпеня а 15.00 гадзіне на тым самым месцы каля фантана побач з капліцай Еўфрасінні Полайкай ц Рэчыцы павінен адбыцца яшчэ адзін пікет з удзелам самой кандыдаткі – Святланы Ціханоўскай, а таксама Веранікі Цапкалы і Марыі Калеснікавай.