Партыя патрабавала прызнаць незаконным рашэнне Калінкавіцкага райвыканкама аб фармаванні ўчастковых выбарчых камісіяў і спыніць паўнамоцтвы прызначаных чальцоў камісіяў на той падставе, што іх фармаванне адбывалася негалосна, як патрабуе Канстытуцыя.
Аляксандр Елісееў
Жыхар Калінкавічаў і сябра Аб’яднанай грамадзянскай
партыі Аляксандр Елісееў быў
вылучаны Гомельскай абласной арганізацыяй Аб’яднанай грамадзянскай партыі ў
склад участковай выбарчай камісіі № 4 па Калінкавіцкім раёне. Але на паседжанні
райвыканкама, падчас якога ўтваралі камісіі, Елісеева ў склад камісіі не
ўключылі, сфармаваўшы яе з 12 чальцоў, хаця, Выбарчы кодэкс дазваляе ўключаць у
камісіі да 19 чальцоў.
Пры гэтым самога Елісеева не дапусцілі на паседжанне. Ён
меў намер весці відэаздымку таго, што адбывалася на паседжанні, і прыйшоў у
будынак выканкама ў відэакамерай і заплечнікам. Але супрацоўнік Калінкавіцкага
аддзела Дэпартамента аховы старшы лейтэнант міліцыі Голуб, які ахоўваў уваход у выканкам, а таксама начальніца аргаддзелу
выканкама Алена Верабей не пусцілі
Елісеева далей за турнікет у фае, даводзячы яму, што паводле інструкцыі аб
прапускным рэжыме ў выканкам, туды нельга ўваходзіць з відэазапісваючай
апаратурай і вялікай ручной паклажай.
Елісееў жа спасылаўся на артыкул 65 Канстытуцыі і артыкул
13 Выбарчага кодэксу, якія ўстанаўліваюць, што падрыхтоўка і правядзенне
выбараў у Беларусі адбываюцца адкрыта і голасна. Менавіта адкрытасці і
галоснасці, на меркаванне Елісеева і мусіла спрыяць здымка паседжання па
фармаванні ўчастковых камісіяў і далейшы распаўсюд гэтай інфармацыі.
Але паседжанне адбылося без Елісеева і без відэафіксацыі.
Гэта ў абласной арганізацыі палічылі парушэннем патрабаванняў Канстытуцыі, Выбарчага
кодэксу і яшчэ шэрагу нормаў законаў. 25 чэрвеня абласная арганізацыя АГП
накіравала ў суд Калінкавіцкага раёна скаргу з падрабязнай аргументацыяй сваёй
пазіцыі. Прадстаўляць цікавасці пазоўцы паводле даверанасці мусіў як раз
Елісееў.
Але 30 чэрвеня абласная арганізацыя партыі атрымала
поштаю вызначэнне аб адмове ў завядзенні грамадзянскай справы, прынятае суддзёй
і намесніцай старшыні суда Калінкавіцкага раёна Галінай Загвоздзінай. Загвоздзіна не стала аспрэчваць аргументы
партыі, выкладзеныя на сямі старонках скаргі, а проста паведаміла, што спыненне
паўнамоцтваў чальцоў выбарчых камісіяў, паводле артыкула 36 Выбарчага кодэксу
ўваходзіць у кампетэнцыю органаў, якія тыя камісіі ўтварылі. Адпаведна, на
думку Загвоздзінай, вырашэнне пытанняў, выкладзеных у скарзе абласной структуры
АГП не ў кампетэнцыі суда.
«Класічнае рашэнне суда, які не змог знайсці якой-небудзь няправільнасці ў аргументах заяўніка, таму проста з'ехаў з вырашэння складанага пытання. Законы, якія перашкаджалі суду прыняць рашэнне супраць заяўніка, проста праігнараваныя. Так што, у некаторай ступені можна адзначыць перамогу. Ім няма чым біць нашыя аргументы», – пракаментаваў артыманы адказ Аляксандр Елісееў.
