Гомельскі абласны суд адмяніў вызначэнне рэчыцкага раённага суда, якое абмяжоўвала магчымасць разгляду законнасці "аўтаматычнай" перадачы работніцы ад аднаго гандлёвага прадпрыемства іншаму.
Марыя Сівуха (справа) разам з прававым інспектарам прафсаюзу РЭП Леанідам Судаленкам у зале абласнога суда
Ужо амаль восем месяцаў доўжыцца цыкл судовых цяжбаў маладой маці, прадавачкі Марыі Сівуха, якая падпісала тэрміновы працоўны дагавор з Рэчыцкім райпо, але была пераведзеная разам са сваёй крамай у іншае гандлёвае прадпрыемства. Пры гэтым, Марыя не падпісвала працоўнай дамовы з новым наймальнікам, што не перашкодзіла яму выставіць маладой прадавачцы буйную нястачу.
Сітуацыю каментуе прававы інспектар працы прафсаюза РЭП Леанід Судаленка:
- Мы задаволеныя вердыктам абласнога суда. Знятая апошняя перашкода на шляху разгляду справы па сутнасці. Раённы суд двойчы адхіляў нашу скаргу і мы двойчы абскарджвалі гэтыя дзеянні ў абласным судзе. Наша пазіцыя па гэтай справе - калі не было працоўнага дагавора і дагавора аб матэрыяльнай адказнасці, то не можа быць і матэрыяльнай адказнасці, а значыць Марыя Сівуха павінна быць цалкам вызвалена ад выплаты нястачы. І мы будзем адстойваць гэтую пазіцыю і правы нашага члена прафсаюза да канца.
Член Савета прафсаюза РЭП Андрэй Стрыжак таксама пракаментаваў рэзанансную справу:
- Райпо ўпэўнена трымаецца сярод лідэраў у нашым рэйтынгу парушальнікаў працоўных правоў. Мы неаднаразова судзіліся з імі за нашых сябраў прафсаюза, але гэтая справа здзіўляе тым, што чалавека перадалі з балансу аднаго прадпрыемства на іншае, як лядоўню або скрыню кансерваў або проста як прыгонную сялянку. З новым наймальнікам у Марыі Сівуха дэ-юрэ не было працоўных адносін і таму яна нічога яму выплачваць не павiнна.