>
За першую палову лістапада двое жыхароў Рэчыцкага раёна прызнаны беларускімі
праваабаронцамі палітычнымі зняволенымі.
Адзін з іх – 61-гадовы Аляксандр Гладкіх (на здымку). Ён быў
затрыманы 15 сакавіка. 1 лістапада суд Рэчыцкага раёна вынес яму прыгавор
паводле артыкула 369 Крымінальнага кодэкса – «Абраза прадстаўніка ўлады».
Прычынай, які і ў шэрагу іншых крымінальных спраў па ўсёй краіне, стаў
каментарый, які грамадзянін напісаў у сацсетцы «Аднакласнікі» пра Ігара Вольніча, інспектара
дарожна-патрульнай службы аддзялення ДАІ Ганцавіцкага РАУС Брэсцкай вобласці –
той ўдельнічаў у разгоне мірнай акцыі і прыдушыў каленам шыю чалавека, які
ляжаў на зямлі і не аказваў супраціву (было налічана 1870 адмоўных каментарыяў
пра дзеянні міліцыянта). Сам «пацярпелы» у выніку каментарыя міліцыянт на судзе
не прысутнічаў, але даслаў патрабаванне спагнаць з рэчычаніна 1500 руб.
кампенсацыі за «маральныя пакуты».
У выніку жыхар Рэчыцкага раёна прыгавораны да 2 гадоў абмежавання волі з
накіраваннем у папраўчую ўстанову адкрытага тыпу (ПУАТ) і выплаце міліцыянту
1500 рублёў. Справу вёў суддзя Станіслаў Іванюценка, дзяржаўным абвінаваўцам выступаў намеснік
пракурора Рэчыцкага раёна Мікалай Ласіца. Грамадзяніна ўнеслі ў пералік асобаў, якія «маюць дачыненне да
экстрэмісцкай дзейнасці».
3 лістапада праваабаронцы прызналі Аляксандра
Гладкіх палітзняволеным. Паштоўкі і лісты яму можна дасылаць на адрас: ПУАТ № 36, вул. Караткевіча, 14, г. Мінск,
220039. У гэтай ПУАТ зараз адбываюць пакаранні 18 палітзняволеных.
Палітзняволеным прызнаны таксама 43-гадовы жыхар Рэчыцы Уладзімір Чмураў. Ён быў
затрыманы 1 жніўня, абвінавачаны паводле артыкула 368 КК (абраза прэзідэнта) і
змешчаны ў СІЗА ў якасці асобы, у адносінах да якой орган, які вядзе
крымінальны працэс, ужыў меру стрымання ў выглядзе заключэння пад варту. 5
лістапада праваабаронцы прызналі яго палітзняволеным. Яму можна пісаць на адрас:
СІЗА-3, вул. Кніжная, 1А, г. Гомель,
246003. У гомельскім СІЗА ў цяперашні час знаходзяцца 89 палітзняволеных.
Разам за першую палову лістапада праваабаронцы Беларусі прызналі 86 новых
палітзняволеных. 14 з іх – з Гомельскай вобласці. Акрамя двух жыхароў Рэчыцкага
раёна, гэта 7 чалавек з Гомеля, 4 са Жлобінскага і 1 з Мазырскага раёнаў.
Агульная колькасць палітзняволеных у Беларусі на сённяшні дзень – 1421.
На здымку: Аляксандр
Гладкіх.
