Жыхару Калінкавіцкага раёна пагражае смяротнае пакаранне

Палеская Вясна 11.03.2020

23-гадовы жыхар вёскі Вязавіца Калінкавіцкага раёна абвінавачваецца ў забойстве з асаблівай жорсткасцю жонкі святара ў мястэчку Азарычы. За такое злачынства яму могуць вынесці смяротны прысуд.

Як паведамляе Следчы Камітэт, у выніку расследавання крымінальнай справы аб забойстве жанчыны ў Азарычах следчым удалося аднавіць акалічнасці таго, што адбылося, і сабраць неабходную доказную базу.

2 кастрычніка 2019 года у сваёй хаце ў Азарычах была знойдзеная без прыкметаў жыцця 42-гадовая жанчына. Адразу ж на месцы свайго жыхарства быў затрыманы яе 47-гадовы муж, які знаходзіўся ў стане алкагольнага ап’янення. Спачатку следчыя падазравалі яго ў здзяйсненні забойства жонкі. Мужчына аказаўся святаром мясцовага праваслаўнага храма.

Але 3 кастрычніка следчыя затрымалі 23-гадовага жыхара суседняй вёскі Вязавіца. Паводле версіі следства, 1 кастычніка ён працаваў у храме, выконваючы там рамонтныя работы. Скончыўшы працу, ён патэлефанаваў сваёй дзяўчыне. Але падчас размовы маладзёны пасварыліся. Хлопец ужыў алкаголь і вырашыў на аўтамабіле святара паехаць да дзяўчыны.

Ён прыйшоў дамоў да святара, але дзверы адчыніла ягоная жонка. Абвінавачаны пачаў патрабаваць ключы ад аўтамабіля, на што жанчына адмовіла і паспрабавала зачыніцца знутры дома. Але хлопец нанёс ёй удар нажом і патрапіў у хату. Там ён збіў жонку святара і нанёс ёй яшчэ шмат удараў нажом у розныя часткі цела. Потым, скраўшы з жытла 20 даляраў ЗША, 1000 расійскіх рублёў і мабільны тэлефон, маладзён узяў ключы ад аўтамабіля і паехаў на ім у Вязавіцу. Там ён заехаў на малочна-таварную ферму, дзе сутыкнуўся са смеццевым кантэйнерам, цюкам саломы і ёмістасцю для вады. Даяркі, якія сталі сведкамі ДТЗ, адабралі ў хлопца ключы ад машыны. Пасля гэтага ён схаваўся, але праваахоўнікам стала вядомая інфармацыя пра ДТЗ, і ў выніку следчых дзеянняў месца знаходжання падазраванага было выкрыта. Дзе падчас усіх гэтых падзеяў быў муж загінулай, які назаўтра быў знойдзены п’яным ва ўласнай хаце, не паведамляецца.

Зараз 23-гадовага жыхара Калінкавіцкага раёна абвінавачваюць у злачынствах, прадугледжаных часткай 3 артыкула 207 (разбой, здзейснены з пранікненнем у жытло, паўторна, з прычыненнем цяжкага цялеснага пашкоджання), часткай 2 артыкула 139 (забойства, здзейсненае з асаблівай жорсткасцю) і часткай 3 артыкула 214 (згон аўтамабіля, здзейснены з ужываннем гвалту, небяспечнага для жыцця і здароўя і з пагрозай яго ўжывання). Паведамляецца, што раней 23-гадовы мужчына прыцягваўся да крымінальнай адказнасці за крадзёж і хуліганства.

Крымінальная справа перададзеная пракурору для накіравання ў суд.


Чытайце таксама:


Камітэт ААН па правах чалавека зафіксаваў парушэнні Беларуссю правоў чалавека расстрэлам Сяргея Іванова з Рэчыцы


Калі жыхару Калінкавіцкага раёна прысудзяць смяротнае пакаранне, гэта будзе ўжо трэці смяротны прысуд, вынесены ў Беларусі ў 2020 годзе. Беларусь – адзіная краіна ў Еўропе, якая ўжывае да сваіх грамадзян пакаранне смерцю ад імя дзяржавы.