Супрацоўнікі «хуткай» з Калінкавічаў месяц чакалі вынікі аналізаў на COVID-19. Выявілася, што яны заражаныя. «Але начальства сказала хадзіць на працу! Уявіце — мы, хворыя на каранавірус — месяц вазілі людзей і далей будзем расцягваць заразу па горадзе?», — абурыліся мэдыкі.
Яны расказалі Свабодзе пра недахоп сродкаў індывідуальнай засцярогі, — месяц чакання вынікаў аналізаў, — пазбаўленне абяцаных надбавак, — паказуху перад камісіяй з Гомельскага ўпраўлення аховы здароўя.
На калінкавіцкай хуткай працуе, паводле супрацоўнікаў, каля 100 чалавек. На зьмене — каля 15. Паводле фэльчаркі Ганны (імя змененае на яе просьбу. — РС), месяц таму, 30 красавіка, у 30 супрацоўнікаў хуткай узялі мазкі на каранавірус. Толькі 25 траўня прыйшлі вынікі. У 14 медыкаў каранавірус пацвердзіўся. Рэшта — 16 чалавек — пакуль не атрымалі вынікаў.
«Нам сказала начальства ісці і працаваць далей! Што мы ўжо перахварэлі і нам няма чаго баяцца! У нас сем’і, дзеці — гэта адно. Другое — мы штодзень вазілі і возім людзей. Уявіце, што мы самі разносім заразу па Калінкавічах! Гэта проста жах. Больш і больш заражаем людзей, выходзіць? Мы і так не даем рады, бо хворых вельмі шмат», — кажа Ганна.
Яна кажа, што першыя выпадкі СOVID-19 фіксаваліся ў Калінкавічах яшчэ ў лютым, але сродкаў засцярогі не было.
«Тады мы стараліся самі сябе абараніць — шылі самі маскі, мылі іх, прасавалі. Цяпер нам выдаюць нават засцерагальныя касцюмы — аднаразовыя, якія мы выкарыстоўваем па шмат разоў. Пасля мыцця яны жалю вартыя — расцягнутыя, з дзіркамі», — тлумачыць фэльчарка.
Паводле яе, 29 траўня прыяжджала камісія з Гомельскага ўпраўлення аховы здароўя.
«Да камісіі падрыхтаваліся — прывезлі мяшкі проста засцерагальных касцюмаў, рэспіратараў. Усім, хто працаваў, сказалі прыбрацца, нават кіроўцам, якія ніколі ня ездзілі ў касьцюмах. На сход паклікалі толькі тых людзей, якія маўчаць, бо баяцца начальства, ці пэнсіянэраў, якія баяцца страціць працу. Яны казалі, што ў нас усё добра», — сказала Ганна.
Яе і калегаў абурыла сытуацыя з абяцанымі надбаўкамі. Паводле фэльчаркі, спачатку ім выдалі разліковыя, дзе былі пазначаны надбаўкі па 2000 рублёў. Ганна, напрыклад, магла атрымаць 2800.
«Праз два дні сказалі, што разліковыя хібныя, і далі іншыя. Там былі надбаўкі па 150–300 рублёў, а некаторым увогуле нічога! Нам начальства патлумачыла, што мы самі павінны пацвердзіць, што вазілі хворых на каранавірус. Як гэта рабіць? Мы вязём, ратуем хворага і ня можам ведаць, заразны ён ці не. Вынікі прыходзяць праз 2–3 тыдні. І мы павінны самі іх шукаць. Мы працуем так цяпер, што прысесці ня можам — хворых вельмі шмат. А яшчэ і шукаць самім звесткі пра хворых», — кажа мэдык.
Адзінае, што могуць больш-менш даказаць супрацоўнікі «хуткай», — гэта выпадкі, калі вязуць хворага з пацверджаным каранавірусам на Гомель.
«А возім вельмі часта, і часцей чамусці начамі», — кажа фэльчарка.
Ганна кажа, што начальства не рэагуе на скаргі, а палохае людзей кантрактам ці звальненнем. «Я, па-першае, люблю сваю працу. Па-другое — дзе знайсці іншую працу ў Калінкавічах? Мы проста не вытрымліваем ад гэтага ўсяго — шмат хворых і працы, а нас абкрадаюць проста. Самі хворыя — і ня ведаем пра гэта. Прывезлі сродкі засцярогі, каб стварыць паказуху, нікому не патрэбную, для камісіі з Гомля», — кажа фэльчарка.
Загадчык хуткай дапамогі Андрэй Хутлікаў адказаў БелаПАН, што да яго са скаргамі падначаленыя не звярталіся. Па падрабязнасці ён параіў тэлефанаваць да намесніка галоўнага лекара. Наконт каронавірусу ў супрацоўнікаў адмовіўся камэнтаваць.
На працягу працоўнага дня ў пятніцу ніводзін тэлефон адміністрацыі не адказваў. У прыёмнай галоўнага лекара адказалі: «Нікога няма — хто на раёне, хто ў аддзяленнях. Мабільных тэлефонаў мы не даём».
Намесніца галоўнага лекара Алена Лешанок не здымала слухаўку. Яе калегі адказвалі, што яна занятая.
Пазней фэльчарка паведаміла, што ў суботу супрацоўнікаў «хуткай» знянацку сабралі, каб узяць экспрэс-тэсты на каранавірус. «Праз нейкі час паведамілі, што «вы ніхто і не хварэлі», што тэсты – адмоўныя ва ўсіх чатырнаццаці чалавек. Начальства сказала, што гэта трэба напісаць «у інтэрнэт», каб зняпраўдзіць распаўсюджаныя там звесткі». Раней спісы заражаных мэдыцынскіх супрацоўнікаў зявіліся ў пэўных тэлеграм-каналах.
ДЗ. Радыё Свабода
Фота: knews.by носіць ілюстрацыйны характар
